"მიშას [სააკაშვილის] დროიდან დღემდე ოჯახური ბიზნესი გაქვს სასამართლოში დალაგებული", — ასე მიმართა ქართული ოცნების ყოფილმა წევრმა, ეკა ბესელიამ მმართველი გუნდის დეპუტატს, მამუკა მდინარაძეს მას შემდეგ, რაც მან ბესელიას გადადგომაზე ისაუბრა.

იურიდიულ საკითხთა კომიტეტის სხდომაზე უზენაეს სასამართლოში მოსამართლეთა შერჩევის კრიტერიუმების კანონპროექტს განიხილავენ. სხდომაზე მამუკა მდინარაძემ განაცხადა, რომ ეკა ბესელიას შეეძლო, კომიტეტის თავმჯდომარის თანამდებობა არ დაეტოვებინა, რასაც ბესელიას რეპლიკა მოჰყვა:

"ამ თემას თავი დაანებე, ამ თემას ნუ ეთამაშები, არ გაქვს ამის უფლება", — ამ რეპლიკას მამუკა მდინარაძის სიტყვები მოჰყვა, რომ ბესელიას თვითონ ამოძრავებს სუბიექტური ინტერესები, "რასაც დრო აჩვენებს".

"მიშას დროიდან დღემდე ოჯახური ბიზნესი გაქვს სასამართლოში დალაგებული... შენ როგორ ლაპარაკობ სუბიექტურ ინტერესებზე, იმ ადვოკატების ჯგუფში იყავი, ვინც სანდო ადვოკატებად მიიჩნეოდა", — თქვა ბესელიამ, რაზეც მდინარაძემ უპასუხა:

"რა მქონდა დალაგებული, პროკურატურაში ვერ შევდიოდი და რომ შევდიოდი, იქ მხვდებოდი ხოლმე და მე მქონდა დალაგებული, მე მელაპარაკები მაგას, სულ გადაირიეთ?"

ეკა ბესელია იურიდიული საკითხთა კომიტეტის თავმჯდომარეობიდან 2018 წლის დეკემბრის ბოლოს გადადგა. როგორც მაშინ ბესელიამ განაცხადა, მისი გადადგომის საფუძველი უზენაეს სასამართლოს მოსამართლეობის კანდიდატები სია გახდა. ბესელიას პოზიციით, იუსტიციის უმაღლესი საბჭოს მიერ წარდგენილ სიაში მყოფი მოსამართლეები ნაციონალური მოძრაობის დანაშაულებრივ რეჟიმს უკავშირდებოდნენ და მათი არჩევა სასამართლო სისტემისა და ქართული ოცნების ღირებულებების ნგრევისკენ გადადგმული ნაბიჯი იქნებოდა.

წასვლის მიზეზებზე საუბრისას ბესელიამ განაცხადა, რომ საქართველოს პარლამენტის თავმჯდომარემ, ირაკლი კობახიძემ მას მოსთხოვა მოსამართლეების სია პარლამენტში დარეგისტრირებიდან მეოთხე დღეს განეხილა და მხარი დაეჭირა. დეპუტატის თქმით, სწორედ ამ მიზეზით დატოვა იურიდიულ საკითხთა კომიტეტის თავმჯდომარის პოსტი და ამით უზენაესი სასამართლოს მოსამართლეების სიის დამტკიცებას შეუშალა ხელი.