ნაციონალური მოძრაობის ლიდერის, ზაალ უდუმაშვილის თქმით, ბიძინა ივანიშვილი თავს ესხმის როგორც "თავისუფალ ბიზნესს" ისე "თავისუფალ მედიას". ასე გამოეხმაურა ნაციონალური მოძრაობა საქართველოს პროკურატურის მიერ გავრცელებულ წერილს, რომელიც საგამოძიებო უწყების თქმით, მამუკა ხაზარაძემ წარადგინა.

მისი თქმით, გაერთიანებული ოპოზიცია აბსოლუტურ ნდობას უცხადებს მამუკა ხაზარაძის მტკიცებულებას, რომლებიც დღეს პროკურატურამ გაასაჯაროვა.

"ვაცხადებთ, რომ არანაირი იმედი არ გვაქვს, ამ ხელისუფლების და ამ პროკურატურის პირობებში ამ საქმის გამოძიების. დარწმუნებული ვართ, ახალი ხელისუფლების პირობებში, ყველას მოუწევს პასუხისმგებლობაში მიცემა, ვისაც რაიმე კავშირი აქვს ამ ბინძურ საქმესთან. გამოქვეყნებული წერილი ადასტურებს, რომ სახეზეა ივანიშვილის რეჟიმის დანაშაულებრივი ქმედებები", — განაცხადა უდუმაშვილმა.

უდუმაშვილის თქმით, არსებობს კიდევ დამატებითი მტკიცებულებები ხელისუფლების მიერ განხორციელებული ძალადობრივი ქმედებების შესახებ თიბისი ჯგუფის საქმეში.

უდუმაშვილის განცხადებით, ასევე, ივანიშვილს სურს გააკონტროლოს სრულიად არაპოლიტიკური არხი არტარეა.

"ამ წერილშივე კარგად ჩანს, რომ ტელეკომპანია იმედი ქართული ოცნების პოლიტიკური მიზნების მსახურია და იცავს მხოლოდ ივანიშვილის პირად ინტერესებს. ამავე დროს, ამ წერილით დასტურდება, რომ საპრეზიდენტო არჩევნებში ხელისუფლების არჩეული გზა იყო არა თანასწორობაზე დაფუძნებული პოლიტიკური კონკურენცია, არამედ ზეწოლა, დაშინება, შანტაჟი არჩევნების გაყალბების მიზნით, მათ შორის, ხელისუფლების მიერ კონტროლირებადი მედიის გამოყენებითაც", — განაცხადა უდუმაშვილმა.

მისი თქმით, ის, რაც აქამდე ცნობილი იყო, დღეს ფაქტობრივად დოკუმენტურად დადასტურდა. უდუნაშვილის ასევე ფიქრობს, რომ ივანიშვილის მიზანი არა სახელმწიფოს წინსვლა და მისი განვითარება, არამედ ქვეყანაში არსებული ყველა დამოუკიდებელი ინსტიტუტი ხელში ჩაგდებაა.

ზაალ უდუმაშვილი საპარლამენტო უმრავლესობის ლიდერის არჩილ თალაკვაძის დღევანდელ განცხადებასაც გამოეხმაურა და თალაკვაძე ტყუილში დაადანაშაულა.

"ბატონმა არჩილ თალაკვაძემ თვალებში ჩამხედოს მეც და თვალებში ჩახედოს რუსთავი 2-ის ათასამდე თანამშრომელს, როდესაც ასეთ უტიფარ ტყუილს კადრულობს. მე ძალიან კარგად მახსოვს, როგორ შეტევას ახორციელებდა ივანიშვილის რეჟიმი „რუსთავი 2“-ზე, თუმცა მაშინ საზოგადოების აქტიურობის, ჩვენი პარტნიორების და რაც მთავარია, სტრასბურგის სასამართლოს ძალიან პრინციპული პოზიციის შედეგად თავისუფალმა სიტყვამ გაიმარჯვა", — თქვა უდუმაშვილმა.

მისი თქმით, საჭიროა საზოგადოების ერთიანობით "დავიცვათ ტელეკომპანია პირველი, რათა წინ აღვუდგეთ ივანიშვილის ანტისახელმწიფოებრივ პოლიტიკას".

პროკურატურამ გაასაჯაროვა თიბისი ბანკის დამფუძნებლის, მამუკა ხაზარაძის მიერ მტკიცებულებად წარდგენილი დოკუმენტი, რომელიც ხაზარაძის განცხადებით, ამტკიცებს, რომ შს მინისტრი გიორგი გახარია მას ემუქრებოდა. წერილის მიხედვით, ხაზარაძეს სამ პირობის შესრულებას სთხოვდნენ. პირველი - ტელეკომპანია პირველმა შეიცვალოს სარედაქციო პოლიტიკა და ტელეკომპანია იმედის მსგავსად ჩაერთოს ომში ოპოზიცის წინააღმდეგ. მეორე — ხაზარაძემ გააკეთოს განცხადება, რომ მისთვის მიუღებელია ნაციონალური მოძრაობის რევანში და ბიზნესს კარგად ახსოვს, როგორ ექცეოდნენ წინა ხელისუფლების პირობებში. მესამე — ტელეკომპანია არტარეა, რომელიც ხაზარაძის საკუთრებაა, ჩაერთოს პოლიტიკურ კამპანიაში.