შინაგან საქმეთა მინისტრისგან, გიორგი გახარიასგან სავარაუდო მუქარის საქმეზე თიბისის დამფუძნებელს, მამუკა ხაზარაძეს თბილისის საქალაქო სასამართლოში დღეს გამოკითხავენ. ამის შესახებ ინფორმაცია On.ge-ს პროკურატურაში დაუდასტურეს.

გუშინ პროკურატურამ გაავრცელა განცხადება, სადაც აღნიშნული იყო, რომ მამუკა ხაზარაძის განცხადება, თითქოს უწყება ინფორმირებული იყო იმის შესახებ, რომ გიორგი გახარია მას, სავარაუდოდ, ემუქრებოდა, სიმართლეს არ შეესაბამება. მათი თქმით, ხაზარაძეს ამის შესახებ დაკითხვისას არ უსაუბრია და მუქარა მხოლოდ ეროვნული ბანკის წერილში დაინახა.

გუშინ, 4 მარტს პარლამენტში თიბისის დამფუძნებლებს, მამუკა ხაზარაძესა და ბადრი ჯაფარიძეს მოუსმინეს. ამ სხდომაზე მამუკა ხაზარაძემ განაცხადა, რომ არჩევნების წინ მაღალჩინოსანმა წერილი მიწერა, რომლის მიხედვითაც მოთხოვნების შეუსრულებლობის შემთხვეევაში დაუნგრევდნენ რეპუტაციას ქვეყნისა და საერთაშორისო ასპარეზზე. შემდგომში ხაზარაძემ განმარტა, რომ ეს წერილი გახარიასგან მიიღო. ბიზნესმენმა აღნიშნა, რომ ამასთან დაკავშირებით პროკურატურა ინფორმირებული იყო.

გარდა ამისა, ხაზარაძემ განაცხადა, რომ ეროვნული ბანკის პრეზიდენტი და მისი მოადგილე აშანტაჟებდნენ. ის ორივე მათგანის პასუხისმგებლობის დაყენებას ითხოვს.