საქართველოს ეროვნული ნაკრების კაპიტანი და ევროპის ერთ-ერთი საუკეთესო მძიმე ფორვარდი, 34 წლის თორნიკე შენგელია ბარსელონას ტოვებს. ესპანური მედია წერს, რომ გადაწყვეტილება უკვე მიღებულია და რომ ქართველი კალათბურთელი უახლოეს პერიოდში ახალ კლუბს — დუბაის შეუერთდება.

ცნობილია, რომ ტრანსფერის განსახორციელებლად შენგელიას კონტრაქტის გამოსასყიდი თანხა 900 000 ევროს შეადგენს.

აღსანიშნავია, რომ ზაფხულის სატრანსფერო ფანჯრისას ქართველი ფორვარდის გადაბირებით ევროპული კალათბურთის არაერთი გრანდი იყო დაინტერესებული. მსურველთა შორის იყვნენ ევროლიგის მოქმედი ჩემპიონი ოლიმპიაკოსი, ასევე ფენერბაჰჩე, მადრიდის რეალი და სერბული პარტიზანი. მიუხედავად ასეთი ინტერესისა, შენგელიამ არჩევანი სწორედ არაბულ კლუბზე შეაჩერა.

რატომ დუბაი და რატომ ტოვებს ბარსელონას?

ერთი მხრივ, ბარსელონას დატოვება კატალონიურ კლუბში მიმდინარე რადიკალურმა ცვლილებებმაც დააჩქარა. კლუბიდან წავიდნენ მთავარი მწვრთნელი, გენერალური მენეჯერმი და კიდევ 9 კალათბურთელი. ასეთი მასშტაბის წმენდისა და ცვლილებების ფონზე, რთული სათქმელია, რამდენად მოახერხებდა კლუბი ახალი სეზონისთვის რეალურად კონკურენტუნარიანი შემადგენლობის შეკრებას.

ძირითადი ფაქტორი, რამაც თორნიკეს გადაწყვეტილება განაპირობა, დუბაის მთავარი მწვრთნელი, ხავიერ პასკუალია. შენგელიას ესპანელ სპეციალისტთან მუშაობის წარმატებული გამოცდილება ჯერ კიდევ ბარსელონაში პირველი პერიოდიდან აკავშირებს.

შენგელიას მიზანია, რომ კარიერის მიწურულს ევროლიგა მოიგოს და ამ მხრივ, დუბაის პროექტი საკმაოდ პერსპექტიულია. გუნდში არაერთი ვარსკვლავია, მათ შორის არიან ამერიკელი, სერბი და სხვადასხვა ევროპული ქვეყნის წარმომადგენელი კალათბურთელები.

ევროლიგის გარდა, დუბაი ABA ლიგაშია წარმოდგენილი, სადაც, ძირითადად, ყოფილი იუგოსლავიის ქვეყნები ასპარეზობენ. დუბაი მათ 2024/25 წლების სეზონიდან დაემატა.

გასულ სეზონში ბარსელონას მაისურით თორნიკე შენგელიას შედეგი: ესპანეთის ლიგა ენდესაში ის საშუალოდ 11.2 ქულასა და 4 მოხსნას აგროვებდა, ხოლო ევროლიგაში — 12.4 ქულასა და 4.6 მოხსნას.

შთამბეჭდავი შემადგენლობის, ასევე კარგად ნაცნობი მწვრთნელის ფონზე, ნათელია, თუ რატომ გახდა დუბაი მიმზიდველი შენგელიასთვის. ევროლიგის კლუბების დაკომპლექტების პროცესი დასკვნით ფაზაშია და მოსალოდნელია, რომ ტრანსფერი უახლოეს დღეებში ოფიციალურადაც დადასტურდება.

ერთად ვუგულშემატკივროთ ქართველ კალათბურთელებს. საქართველოს ბანკი —საქართველოს ეროვნული საკალათბურთო ნაკრების გენერალური სპონსორი.