თიბისი ბანკის დამფუძნებელი მამუკა ხაზარაძე აცხადებს, რომ არჩევნების მეორე ტურის წინ ერთ-ერთი მაღალჩინოსნისგან მუქარის წერილი მიიღო. მისი თქმით, წერილში ეწერა, რომ მოთხოვნების შეუსრულებლობის შემთხვევაში რეპუტაციას ქვეყანაში და საერთაშორისო ასპარეზზე დაუნგრევდნენ.

ხაზარაძე არ პასუხობს კითხვას, ვისგან მიიღო ეს წერილი, მაგრამ აცხადებს, რომ მოთხოვნები არ შესრულებიათ. მისივე თქმით, გაუკვირდა, რომ მუქარა წერილობით მიიღო და არა სიტყვიერად.

მამუკა ხაზარაძეს თიბისი ბანკის საქმეზე საფინანსო-საბიუჯეტო კომიტეტის სხდომაზე უსმენენ. რამდენიმე წუთის წინ მან განაცხადა, რომ ეროვნული ბანკის პრეზიდენტი და მისი მოადგილე აშანტაჟებდნენ. ის ორივე მათგანის პასუხისმგებლობის დაყენებას ითხოვს.

თიბისის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში თავდაპირველად განაცხადეს, რომ სამართლებრივ დავას აპირებდნენ რეგულატორის მოთხოვნის გასაპროტესტებლად. თუმცა, მოგვიანებით დავა შეწყვიტეს და ეროვნული ბანკის დაკისრებული მილიონიანი ჯარიმა გადაიხადეს.

ხაზარაძემ და ჯაფარიძემ ბანკის სამეთვალყურეო საბჭოს თავმჯდომარისა და მოადგილის თანამდებობები დატოვეს, მაგრამ განაცხადეს, რომ ეროვნული ბანკის წინააღმდეგ პირად დავას აგრძელებენ.