საქართველოს ყოფილი პრემიერ-მინისტრი ირაკლი ღარიბაშვილი პოლიტიკაში დაბრუნდა. მან პარტია ქართულ ოცნებაში პოლიტიკური მდივნის პოსტი დაიკავა. ის პარტიის პოლიტსაბჭოს წევრიც იქნება. ქართული ოცნების პოლიტსაბჭომ მისი დაბრუნების საკითხზე დღეს, 5 მარტს იმსჯელა. სხდომას ბიძინა ივანიშვილი უძღვებოდა.

"ყველასთვის ცნობილია, რომ ირაკლი ღარიბაშვილი არის გამორჩეული თვისებებისა და გამოცდილების მქონე ადამიანი, რომელიც 2011 წლიდან მონაწილეობდა ქართული ოცნების დაფუძნებასა და ჩამოყალიბებაში და რომელმაც პრემიერ-მინისტრისა და პარტიის თავმჯდომარის რანგში მნიშვნელოვანი წვლილი შეიტანა ჩვენი სახელმწიფოს განვითარებაში. პოლიტიკური მდივნის რანგში, ირაკლი ღარიბაშვილი მნიშვნელოვან წვლილს შეიტანს პარტიის შემდგომ გაძლიერებაში", — განაცხადა კახა კალაძემ.

ირაკლი ღარიბაშვილის პოლიტიკაში დაბრუნების შესახებ პარტიის თავმჯდომარემ ბიძინა ივანიშვილმა არჩევნების მეორე ტურის წინ, საგანგებო განცხადების დროსაც მიანიშნა. 5 ნოემბერს გავრცელებულ ვიდეომიმართვაში ივანიშვილმა თქვა, რომ "ძველ გვარდიას", გაბრაზებულ თანამებრძოლებს მიმართა.

ირაკლი ღარიბაშვილი

საქართველოს ყოფილმა პრემიერ-მინისტრმა ირაკლი ღარიბაშვილმა გადადგომის შესახებ განცხადება 23 დეკემბერს, საღამოს 8 საათზე გააკეთა.

ყოფილი პრემიერის გამოსვლა დღის განმავლობაში სამჯერ გადაიდო. ის ჯერ ორ საათზე იყო დაანონსებული, შემდეგ ექვსზე, საბოლოოდ კი გადადგომის შესახებ განცხადება ღარიბაშვილმა 8 საათზე გააკეთა.

ირაკლი ღარიბაშვილს არ განუმარტავს მიზეზი, თუ რატომ ტოვებს თანამდებობას და არც ის უთქვამს, ვინ შეიძლება დაიკავოს მისი თანამდებობა, თუმცა ოპონენტები მიიჩნევდნენ, რომ პრემიერ-მინისტრის გადადგომა ბევრს არაფერს შეცვლიდა.

მიუხედავად გადადგომისა, ირაკლი ღარიბაშვილი ქართული ოცნების მიმართ მხარდამჭერ განცხადებებს ყოველთვის აკეთებდა. ის ესწრებოდა ქართული ოცნების ყრილობებსაც, ხოლო არჩევნების მეორე ტურის წინ საგანგებო განცხადებით ამომრჩეველს ქართული ოცნების მხარდაჭერისკენაც მოუწოდა.

ირაკლი ღარიბაშვილმა პრემიერ-მინისტრის თანამდებობა 2013 წელს ბიძინა ივანიშვილის შემდეგ დაიკავა, მანამდე კი, 2012 წლიდან მოყოლებული, შინაგან საქმეთა მინისტრი იყო.
კოალიცია ქართული ოცნების ხელისუფლებაში მოსვლამდე, ანუ 2012 წლამდე, ირაკლი ღარიბაშვილი სხვადასხვა დროს ბანკ ქართუში, სააქციო საზოგადოება ქართუ ჯგუფში და საქველმოქმედო ფონდ ქართუში სხვადასხვა თანამდებობაზე მუშაობდა. ის ასევე ერთ-ერთი დამფუძნებელია პარტიისა ქართული ოცნება - დემოკრატიული საქართველო.