საქართველოს პრეზიდენტი გიორგი მარგველაშვილი შეერთებული შტატების პრეზიდენტს, ბარაკ ობამას, 2001წლის 11 სექტემბრის ტერაქტის 15 წლისთავთან დაკავშირებით წერილს უგზავნის:

„თქვენო აღმატებულებავ,

თხუთმეტი წელი გავიდა 2001 წლის 11 სექტემბრის საზარელი ტერაქტიდან, რომელმაც ათასობით ადამიანის სიცოცხლე იმსხვერპლა და მთელი საერთაშორისო საზოგადოება შეაძრწუნა.

9/11 იყო კაცობრიობის წინააღმდეგ ჩადენილი უმძიმესი დანაშაული, რომელიც მიზნად ისახავდა არამხოლოდ ამერიკელი ხალხის, არამედ მთელი ცივილიზებული სამყაროს შეშინებას. ეს იყო თავდასხმა ჩვენს საერთო ღირებულებებზე, პრინციპებსა და მშვიდობაზე. ყველაზე რთულ დროს, ამერიკელი ერის სიმამაცე და სიმტკიცე იყო წარმოუდგენელი და გასაოცარი. მათი გმირობა, პატრიოტიზმი და სიმამაცე, ამერიკის სახელმწიფოს სიძლიერის დემონსტრირება იყო და მთელს მსოფლიოს ერთობის სულისკვეთება მოუტანა.

დღეს, ამ ტრაგიკული მოვლენის მე-15 წლისთავზე, საქართველო პატივს მიაგებს დაღუპულთა ხსოვნას. ჩვენ,ქართველები თანადგომას უცხადებთ მეგობარ ამერიკელ ხალხს. ქართველი ჯარისკაცები ამერიკული სამხედრო ძალების მხარდამხარ იბრძვიან ავღანეთში, მსოფლიოში სტაბილურობისა და მშვიდობის შენარჩუნებისათვის. მტკიცედ მწამს, რომ ჩვენ, ყველა ერთად მოვიპოვებთ გამარჯვებას თანამედროვეობის ამ უდიდეს საფრთხეზე, რათა უკეთესი მომავალი შევქმნათ შემდგომი თაობებისათვის“.

2001 წლის 11 სექტემბერს, ტერორისტულმა ორგანიზაცია ალ ქაიდამ აშშ–ში მოახერხა 4 სამგზავრო თვითმფრინავის გატაცება, რომლიდანაც 2 დაეჯახა ნიუ–იორკში მდებარე მსოფლიო სავაჭრო ცენტრის 2 შენობას, ერთი – პენტაგონს, ერთი კი მგზავრების ორგანიზებული ქმედების შედეგად დაუსახლებელ ადგილას ჩამოვარდა. აღნიშნული თვითმფრინავის სამიზნეს, სავარაუდოდ, თეთრი სახლი, ან კაპიტოლიუმი წარმოადგენდა. თავდასხმას მაშინ 2 996 ადამიანი ემსხვერპლა, ათასობით კი დაშავდა.