მას შემდეგ, რაც მამუკა ხაზარაძე და ბადრი ჯაფარიძე ეროვნული ბანკის მოთხოვნით თიბისის მმართველი თანამდებობიდან გადადგნენ, ერთი კვირა გავიდა. ამ პერიოდში კომპანიის აქციებზე ფასი მნიშვნელოვნად გაიზარდა. ხელმძღვანელი პირების გადადგომასთან ერთად გამოქვეყნდა ბანკის 2018 წლის ანგარიში.

წლიური ანგარიში ბანკმა ლონდონის საფონდო ბირჟაზე ხაზარაძისა და ჯაფარიძის გადადგომის დღეს, 21 თებერვალს წარადგინა. 2018 წლის განმავლობაში თიბისის ჯამური აქტივების ღირებულება თითქმის 20 პროცენტით არის გაზრდილი და 15,5 მილიარდ ლარს უტოლდება. გაიზარდა კომპანიის სუფთა მოგებაც. 2017 წელთან შედარებით თიბისის სუფთა მოგება 23 პროცენტით გაიზარდა და 454 მილიონ ლარს გაუტოლდა. ამავდროულად, გაიზარდა თიბისის სასესხო და დეპოზიტების პორტფელების მოცულობაც. სესხების პორტფელში ზრდა 21 პროცენტი იყო, ხოლო დეპოზიტების შემთხვევაში კი 19 პროცენტი. დღევანდელი მდგომარეობით, საქართველოს მთლიანი სასესხო პორტფელის 38 პროცენტი თიბისიშია განთავსებული, მაჩვენებელი დეპოტიზეტების შემთხვევაში 41 პროცენტს უტოლდება.

ანგარიშის გამოქვეყნების დღიდან დღემდე აქციებზე ფასი 17 პროცენტით გაიზარდა. 21 თებერვლის სავაჭრო დღის გახსნისთვის ერთი აქციის ფასი 12,90 გირვანქა სტერლინგი იყო, ხოლო პირველი მარტის მონაცემით კი 15,09. თიბისი ბანკის საბაზრო მოცულობაც 699 მილიონი გირვანქა სტერლინგიდან 816 მილიონ გირვანქა სტერლინგამდე გაიზარდა.

ბანკის აქციებზე ფასების კლება საქართველოს პროკურატურის განცხადების შემდგომ დაიწყო. მაშინ ერთ დღეში ბანკის აქციებზე ფასები 5,5 პროცენტით შემცირდა. პროკურატურის განცხადებამდე კომპანიის საბაზრო მოცულობა 803 მილიონ გირვანქა სტერლინგს შეადგენდა, ხოლო განცხადების გავრცელებიდან 24 საათში კი 760 მილიონი. ბოლო სამი წლის მინიმუმიც სწორედ 21 თებერვალს დაფიქსირდა როცა კომპანიის ჯამური მოცულობა 699 მილიონ გირვანქა სტერლინგამდე დაეცა.