თიბისი ბანკის დამფუძნებლები, ბადრი ჯაფარიძე და მამუკა ხაზარაძე პარლამენტში კიდევ ერთხელ, ამჯერად საფინანსო-საბიუჯეტო კომიტეტის სხდომაზე მივლენ. ამის შესახებ ინფორმაცია ჟურნალისტებს საფინანსო-საბიუჯეტო კომიტეტის თავმჯდომარემ, ირაკლი კოვზანაძემ დაუდასტურა. ჯაფარიძე-ხაზარაძეს პარლამენტში ორშაბათს, 4 მარტს 12:00-ზე ელოდებიან.

On.ge-ს თიბისი ბანკის პრესსამსახურში განაცხადეს, რომ ბადრი ჯაფარიძე და მამუკა ხაზარაძე პარლამენტში კიდევ ერთხელ მივლენ.

ირაკლი კოვზანაძემ ბანკის დამფუძნებლები მას შემდეგ დაპატიჟა კომიტეტის სხდომაზე, რაც თიბისი ბანკის თემაზე დანიშნული ეკონომიკური პოლიტიკის კომიტეტის სხდომა ჩავარდა. სწორედ, ამ კომიტეტზე უნდა მოესმინათ ეროვნული ბანკის დირექტორისთვის ოპოზიციის მოთხოვნით. საკომიტეტო მოსმენას თიბისი ბანკის დამფუძნებლებიც ესწრებოდნენ. მათ განცხადების გაკეთება სურდათ, თუმცა სხდომის ჩაშლის გამო ვერ შეძლეს.

თიბისი ბანკის საქმე

8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბარი ჯაფარიძე ფიგურირებდნენ.

ამ საქმესთან დაკავშირებით 13 თებერვალს საქართველოს ეროვნულმა ბანკმა მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭვირვალობაზე.

გარდა ამისა, თიბისი ბანკმა ეროვნული ბანკის წინააღმდეგ სასამართლო დავა შეწყვიტა და განაცხადა, რომ მილიონიან ჯარიმას გადაიხდის. ამასთანავე, ბადრი ჯაფარიძე და მამუკა ხაზარაძე ეროვნული ბანკის წინააღმდეგ კერძო დავას აგრძელებენ.

25 თებერვალს დარგობრივი ეკონომიკის კომიტეტის სხდომაზე თიბისი ბანკის საქმეზე უნდა ემსჯელათ, თუმცა სხდომა საკითხის განხილვის გარეშე დასრულდა. 57 წუთის განმავლობაში დეპუტატები ფორმატზე შესათანხმებლად კამათობდნენ, თუმცა უშედეგოდ. საბოლოოდ, რომან კაკულიამ სხდომა დაასრულა.

გაიგე მეტი: