ორშაბათის ყოველი დილა თავის მხრივ სტრესულია, შესაბამისად, იმის თქმა, რომ თითოეულ ჩვენგანს გარკვეულწილად სტრესულს გარემოში მუშაობა უწევს, მართებულია. თუმცა დამიჯერეთ გაგვიმართლა, რადგან როგორც ფორბსი და CareerCast გვარწმუნებენ, არსებობს ისეთი სამსახურებიც, რომლებშიც ყველა დღე იმაზე გაცილებით სტრესული და მძიმეა, ვიდრე ჩვენი ორშაბათ დილის მაღვიძარას პირველი ზარი.

რა თქმა უნდა, სამსახურეობრივ სტრესს თავისი მიზეზები აქვს. მაგალითად, რამდენად შორ მანძილზეა ოფისი და რომელი ტრანსპორტით გიწევთ გადაადგილება, ყველაზე მტკივნეული თემა - დედლაინები, კონკურენცია, გარემო პირობები, როგორი თანამშრომლები გყავთ, არის თუ არა საშიში თქვენი სამსახური სიცოცხლისთვის, საოფისეა ის თუ ხშირად გიწევთ გარეთ გასვლა მოვალეობის შესასრულებლად და სხვა.

ხშირ შემთხვევაში ზოგიერთი პროფესიის წარმომადგენელმა ზუსტად იცის, რომ მისი სამსახური სტრესული იქნება, მაგალითად, პოლიციელმა და მეხანძრემ, რომლებსაც თავიდანვე გაცნობიერებული აქვთ, რომ მათი სიცოცხლე ყოველთვის რისკის ქვეშ დგას.

რაც შეეხება ყველაზე სტრესულ სამსახურებს ამერიკაში, ათეული ასე გამოიყურება:

1. პილოტი

როცა აანალიზებ, ამხელა სიმაღლეზე, ცაში ხარ გამოკიდებული და ასობით ადამიანის სიცოცხლე გაბარია, სტრესის ქვეშ კი არა ცოცხალი თუ გადარჩები მიწაზე დაფრენამდე ეგეც კარგია.

2. ტაქსის მძღოლი

თბილისის საცობების გადამკიდე ტაქსის მძღოლების ამ სიაში მოხვედრა აღარ უნდა გაგვიკვირდეს, მით უმეტეს ამერიკა უფრო დიდი ქვეყანაა და უფრო დიდი საცობებიც ექნებათ. ყოველ შემთხვევაში ყველა ფილმში, სადაც ლამაზი ბიჭი ლამაზ გოგოს მისდევს აეროპორტში, თვითმფრინავის აფრენამდე კი 12 წამია დარჩენილი, ჩვენი ბიჭი ყოველთვის ხვდება საცობში.

3. ჟურნალ-გაზეთების რეპორტიორი

რა თქმა უნდა, ეს არ ეხება აღმა-დაღმა და ცხელ-ცხელი ამბების ტიპის გაზეთებს. პროფესიონალი რეპორტიორი, რომელიც საინტერესო ამბავზე "ნადირობს" ყოველთვის სტრესის ქვეშ არის.

4. მოცეკვავე

ერთი შეხედვით სტრესული არ ჩანს, თუმცა კარგად თუ დავაკვირდებით, დავინახავთ, რომ ლამაზი, დახვეწილი და სექსუალური მოძრაობების მიღმა ძალიან დიდი შრომა არის ჩადებული, რაც თავისთავად სტრესის გამომწვევიც არის.

5. საინფორმაციო გამოშვების წამყვანი

სტრესი ამათ აქვთ თუ აქვთ. აბა წარმოიდგინეთ, ჯერ პოლიტიკოსის ბრიფინგები, რომლებიც საათობით შეიძლება გაგრძელდეს, შენ კი ამ დროს სტუდიაში ჩაძინების უფლებაც წართმეული გაქვს, მერე ყოველ წამს ახალ-ახალი, ხშირად ტრაგიკული ამბავი გემატება, რომელიც პირველმა შენ უნდა შეატყობინო საზოგადოებას. ნამდვილად სტრესულია არა?!

6. სატელეფონო ზარების ოპერატორი

youtube-ზე თუ ჩაწერეთ - ქალი/კაცი რეკავს კომპანიაში და მოუსმენთ, დამიჯერეთ თქვენც დაისტრესებით. ახლა ხომ წარმოგიდგენიათ ამერიკელ სატელეფონო ოპერატორებს რამდენის გაძლება უწევთ?

7. ექთანი

ასობით ავადმყოფის ყურება ყოველდღე დაგსტრესავს აბა რა იქნება.

8. სამხედროები

აქ კომენტარი საჭირო არ არის.

9. პოლიციელი, სასწრაფო დახმარების ექიმი და მეხანძრე

არც აქ.

10. უროლოგი

პრინციპში თუ კარგად დაფიქრდებით კი არის სტრესული სამსახური.