დღეს დიმიტრი შევარდნაძის ეროვნულ საგამოფენო დარბაზ ცისფერ გალერეაში მხატვარ გია ბუღაძის ნამუშევრების გამოფენა, სახელწოდებით უფსკრული უფსკრულს გასძახის მოეწყო. დამთვალიერებელს ოთხი დარბაზიდან სამში ნახატები, ერთში კი თივითა და მინიატურული ავტომანქანებით შესრულებული ინსტალაცია დახვდა.

როგორც თავად მხატვარი ამბობს, კლასიკური მუსიკის სიყვარულმა გადააწყვეტინა ნამუშევრები ოთხ ნაწილად განვითარების მიხედვით დაეყო. პირველ დარბაზში ავტობიოგრაფიული ნამუშევრები, გისოსებში ჩასმული ავტოპორტრეტი სხვა ნახატები დაგხვდებათ. ეს ადამიანის ცხოვრების პირველი ეტაპია, როდესაც რუტინულად სხვების გავლენის ქვეშ ხარ. მხატვარი პორტრეტებზე ბეჭდის, დაღის დასმით გვიჩვენებს ჩარჩოებში მოთავსებულ ადამიანებს:

„ამისგან გათავისუფლება ერთადერთი რაღაცით შეიძლება მოხდეს, აზროვნებით. არამგონია, ადამიანი რამე სფეროში იყოს თავისუფალი გარდა აზროვნებისა. დანარჩენი ყველაფერი გარდა აზროვნებისა იძულებაა“.

ფოტო: თამო ლიპარტელიანი / On.ge

მეორე დარბაზში ბიბლიოდრამის სახელწოდებით გაერთიანებული ნახატები აზროვნებას, განათლებასა და მისი განვითარების ეტაპებს გადმოსცემს. 32 მეტრიანი ნამუშევარი თავიდან აზროვნების მშენებლობას გიჩვენებს: აშენებ, ალაგებ, როგორც მაღალსართულიან შენობებს, შემდეგ სამსჯავროს პერიოდს გადიხარ, კრიზისს და ამის შემდეგ იბადება ახალი სამყარო, რომელშიც ხელახლა იბადები. როგორც გია ბუღაძე განმარტავს, გამოდის, რომ საკუთარ აზროვნებაში თავიდან იბადები.

ფოტო: თამო ლიპარტელიანი / On.ge

მესამე დარბაზი ინსტალაციას აქვს დათმობილი, სადაც დამტვრეული და ხორცად ქცეული მინიატურული მანქანები თივაში აწყვია. თავად აცხადებს, რომ ვოლკსვაგენის მოდელი მისი სახელწოდების მნიშვნელობის გამო აარჩია:

  • ვოლკსვაგენ ხოჭო
  • ხოჭო ანუ სკარაბა იოსი (ეგვიპტურ მითოლოგიაში)
  • სკარაბა იოსი ანუ თვითდაბადებული ნეხვიდან

ამას გარდა, ინსტალაციაში სამი ძირითადი ფერია გამოყენებული: წითელი, თეთრი და შავი, რაც სამი სკნელის განმარტებას იძლევა. შავი - ქვესკნელი, წითელი - სკნელი და თეთრი - ზესკნელი.

ფოტო: თამო ლიპარტელიანი / On.ge

და ბოლოს, მუსიკალური ნაწარმოების საფინალო ნაწილი და მეოთხე დარბაზში გაერთიანებული ნამუშევრები სახელწოდებით უფსკრული უფსკრულს გასძახის ავტორის განმარტებით ადამიანის ყოველდღიურობა, ბიუროკრატია, პოლიტიკა, კრიზისულობის განცდაა:

"დიდი ხანია ეს აზრი თავში მიტრიალებს. კრიზისულობა მეტად უნდა განვიცადოთ უფრო ძლიერად, რომ გავთავისუფლდეთ. უფსკრული უფსკრულს გასძახის, ეს არის 41-ე ფსალმუნის მეშვიდე თავიდან და ნიშნავს, რომ შენი შინაგანი ზემო სამყაროს უფსკრულს გასძახის".

გამოფენა 28 სექტემბრამდე გაგრძელდება. ის პროექტ VICTIMA I და VICTIMA II-ის გაგრძელებაა, რომელიც დიმიტრი შევარდნაძის სახელობის ეროვნულ გალერეაში 2014 წელს იყო წარმოდგენილი. მაშინ მხატვარმა ტილოზე 2008 წლის აგვისტოს ომის შედეგები გადმოიტანა.