თქვენ ვერ იმგზავრებთ კინგ ქროსის სადგურზე, ვერც 93/4 პლატფორმაზე გაივლით, ჯადოსნური სამყაროს კარის გასაღებად ვერც ალოჰომორას შელოცვას გამოიყენებთ, იმიტომ რომ თქვენ მაგლი ხართ და იმ სამყაროს კარი მხოლოდ ჯადოქრებისთვისაა ღია. მაგრამ, გულს ნუ გაიტეხთ, თუ შემოდგომაზე ფილადელფიას ეწვევით, ჰოგვორტსის ექსპრესით ისარგებლებთ და ჰოგსმიდსაც დალაშქრავთ.

გაინტერესებთ როგორ?

21-22 ოქტომბერს სოფელი ჩესტნატ-ჰილი ჰოგსმიდად გადაიქცევა და ამისთვის არანაირი შელოცვა არ იქნება საჭირო, მაგლებისგან დამცავიც კი. პირიქით, ეს ფესტივალი ჩვენთვის, მაგლებისთვის იმართება, რომლებმაც დღემდე ვერ მივიღეთ წერილი ჰოგვორტსიდან, მაგრამ ჯიუტად არ გვინდა დაჯერება, რომ ამ სამყაროს ვერ ვეზიარებით.

ფესტივალზე იქნება ყველაფერი!

ორგანიზატორები არ ხუმრობენ, აქ მართლა ყველაფერს ნახავთ როულინგის სამყაროდან. ჰოგვორტსის ექსპრესით ხომ იმგზავრებთ, მერე გამანაწილებელ ქუდს მოირგებთ, რომელიც თქვენს ფაკულტეტებზე გაგანაწილებთ. ამ დროს მთავარია არ დაგავიწყდეთ, რომ ქუდი თქვენს თხოვნას გაითვალისწინებს და შეგიძლიათ სასურველ ფაკულტეტზე მოხვდეთ - სლიზერინის გვერდის ავლით. აქ ბნელი ძალებისგან თავდაცვის გაკვეთილებიც ჩატარდება, თქვენი შესაძლებლობები რომ დახვეწოთ. სიკვდილის მხვრელები შეიძლება ვერ დაამარცხოთ, მაგრამ ბოგარტების კლოუნებად გადაქცევა მაგლებსაც გამოგვივა. მაგრამ, ეს ყველაფერი როდია, აქ ქვიდიჩის ტურნირსაც ითამაშებთ და თუ მოიგებთ "ძმური სიყვარულის თასიც" გერგებათ.

აბა რეივენქლოს სწავლის მოყვარულო სტუდენტებო ან ჰერმიონას მსგავსო სხვა ფაკულტეტელებო, ისმინეთ, ჩესტნანტ-ჰილის კოლეჯში კონფერენციაც კი გაიმართება, რომლის თემაც ჰარი პოტერი იქნება. ორგანიზატორების აზრით ეს შესანიშნავი იდეაა, რადგან საუნივერსიტეტო ქალაქი ძალიან ჰგავს ჰოგვორტს.

ჭამა-სმის მოყვარულებო, დამშვიდდით! არც თქვენ დაჩაგრულხართ. აქ ჰოგსმიდის ცნობილი მაღაზიები და ტავერნებიც იქნება. საშუალება გექნებათ მოინახულოთ ზონკოს ოინების მაღაზია, მადამ პადიფუტის ჩაის სახლი და იმედია ტავერნა ტახის თავიც, სადაც შეძლებთ იმ მაგიდაზე დასხდეთ, რომელთანაც დამბლდორის არმიამ ლეგენდარულ დოკუმენტს ხელი მოაწერა და თქვენი სახელიც მიაწეროთ. მთავარია ამბრიჯმა არ გაგიგოთ.

ორგანიზატორებმა სიამოვნებას გაგიათმაგებთო და ჰოგვორტსის ექსპრესზე ლამის გამცილებლის ფუნქცია მოარგეს ჰარის, რონს, ჰერმიონს და დაბმლდორს, უფრო ზუსტად მათ ორეულებს. ანუ გაღიმებული სახით (იმედია შელოცვით შეცვლილი და ორიგინალს დამსგავსებული!) ისინი ექსპრესზე შეგიპატიჟებენ და ფესტივალისკენ გაგიძღვებიან.

ქვიდიჩის მატჩზე დასწრება ფესტივალის სტუმრებისთვის უფასოა. სამეცნიერო კონფერენციაც საზოგადოებისთვის ღია იქნება, მაგრამ რეგისტრაციის თანხა $10-ს შეადგენს. ტავერნის ბილეთების გაყიდვა 28 სექტემბერს დაიწყება.

გაამზადეთ თქვენი მანტიები, ქუდები და ცოცხები, ჰელოუნის გარდერობი გამოქექეთ და დაელოდეთ ოქტომბერს. "აკციო ცოცხი" პოტერჰედებო ფილადელფია გველოდება.