საბერძნეთის პარლამენტმა მაკედონიისთვის სახელწოდების შეცვლას მხარი დაუჭირა. ისტორიული კენჭისყრით ორ ქვეყანას შორის 27-წლიანი დავა ოფიციალურად დასრულდა. მაკედონიას ოფიციალური სახელი ჩრდილოეთ მაკედონიის რესპუბლიკა გახდა.

შეთანხმებას მხარი 153 დეპუტატმა დაუჭირა, ხოლო წინააღმდეგი 146 იყო. შეთანხმებაზე დებატები პარლამენტში 36 საათი გაგრძელდა. კენჭისყრის დროს ულტრა-მემარჯვენე დეპუტატები სხვა პარლამენტარებს მოღალატეებს ეძახდნენ.

"დღეს ისტორიული დღეა. საბერძნეთი იცავს თავისი ისტორიის მნიშვნელოვან ნაწილს, ანტიკური ბერძნული მაკედონიის მემკვიდრეობას. დღეს ჩვენ ბალკანეთის ახალი ისტორია დავწერეთ", — განაცხადა საბერძნეთის პრემიერ-მინისტრმა ალექსის ციპრამ.

მაკედონიის პარლამენტმა აღნიშნულ შეთანხმებას მხარი იანვარში უკვე დაუჭირა. "გილოცავთ, ჩემო მეგობარო, ჩვენს ხალხთან ერთად ისტორიულ გამარჯვებას მივაღწიეთ", — წერს ტვიტერზე მაკედონიის პრემიერ-მინისტრი, ზორან ზაევი.

საპარლამენტო კენჭისყრის წინ საბერძნეთში საპროტესტო აქციები გაიმართა. პოლიციამ აქციის მონაწილეების წინააღმდეგ ცრემლსადენი გაზი გამოიყენა.

საბერძნეთის და მაკედონიის პრემიერ-მინისტრებმა ქვეყნის სახელის ცვლილებასთან დაკავშირებით შეთანხმება 2018 წლის ივნისში გააფორმეს. მაკედონიისთვის სახელის ცვლილების შეთანხმებას მიესალმება გაერო, ევროკავშირი, აშშ და ნატო.

იუგოსლავიის დაშლის შემდეგ ახალი ქვეყნის დასახელების გამო დავა 27 წლის განმავლობაში გაგრძელდა. ეს აფერხებდა ნატოსა და ევროკავშირში მაკედონიის გაწევრიანებას, რადგან საბერძნეთი მოლაპარაკებებს ბლოკავდა.

ბერძნები აპროტესტებდნენ იმას, რომ მეზობელ ქვეყანასა და საბერძნეთის ჩრდილოეთით უძველეს ისტორიულ რეგიონს ერთი სახელი ჰქონოდათ. ისინი სავარაუდო ტერიტორიულ დავებს ერიდებოდნენ.