პარტიზანი მებაღის, მარიამ ბაქრაძის ინფორმაციით, დღეს პარტიზანული მებაღეობა მერიაში პეტიციას შეიტანს, რომლითაც მერიის ეკოლოგიისა და გამწვანების საქალაქო სამსახურის მაღალი თანამდებობის პირების გადადგომას ითხოვს.

როგორც ბაქრაძემ On.ge-სთან საუბარში განმარტა, ამ დროისთვის პარტიზანი მებაღეები თბილისის მერიასთან გაშლილ კარავში მორიგეობას პერმანენტულ რეჟიმში აგრძელებენ. ამასთან, მისი თქმით, ხვალიდან პარტიზანი მებაღე, ნატა ფერაძე ბავშვებისთვის მებაღეობის გაკვეთილებს დედაქალაქის მერიასთან ჩაატარებს ხოლმე.

პარტიზანმა მებაღეებმა თბილისის მერიასთან კარავი 31 აგვისტოს გაშალეს და განმარტეს, რომ თუკი გამწვანების სამსახურის რეორგანიზაციის შესახებ მერიასთან დიალოგი დაიწყება, კარვებს აიღებენ, წინააღმდეგ შემთხვევაში კი მათი ქმედებები უფრო ფართომასშტაბიან პროტესტში გადაიზრდება.

17 აგვისტოს ყაზბეგის გამზირის 24 ნომერში ასწლოვანი ნაძვები გაჩეხეს. ტერიტორიაზე, რომელზეც ადრე სისხლის გადასხმის ინსტიტუტი იყო, ახლა ნგრევა მიმდინარეობს. ადგილზე სამშენებლო კომპანია ორბი ჯგუფი 42 სართულიანი შენობის აშენებას აპირებს. სულ მოჭრილია 13 წიწვოვანი ხე. ფაქტის გასაპროტესტებლად ადგილზე შეიკრიბნენ ადგილობრივი მაცხოვრებლები და პარტიზანული მებაღეობის წარმომადგენლები.