"ეს არის შუალედური გამარჯვება, რადგან ცხადია, რომ მოსამართლეთა ათკაციანი სია ამ ფორმით აღარ გადის კენჭისყრაზე", — ასე ეხმაურება იუსტიციის უმაღლესი საბჭოს არამოსამართლე წევრი ნაზი ჯანეზაშვილი პარლამენტის თავმჯდომარის, ირაკლი კობახიძის განცხადებას, რომლის მიხედვითაც შერჩევის კრიტერიუმების გაწერამდე უზენაესის მოსამართლეებს არ დაამტკიცებენ და კანონით გაწერილი პროცედურები ამჟამინდელ 10-კაცან სიასაც შეეხება,

ნაზი ჯანეზაშვილმა კიდევ ერთხელ ისაუბრა იმ კანონპროექტზე, რომელსაც იუსტიციის უმაღლესი საბჭოს არამოსამართლე წევრთან, ანა დოლიძესთან ერთად პარლამენტში შეიტანს. მისი თქმით, პარლამენტმა ახალი კრიტერიუმების შემუშავებისას რამდენიმე მნიშვნელოვანი პრინციპი უნდა გაითვალისწინოს.

"ორგანულ კანონში ცვლილებების შეტანისას, პარლამენტმა რამდენიმე პრინციპი უნდა გაითვალისწინოს. პირველი, უპირობოდ უნდა გამოცხადდეს კონკურსი. მეორე, აუცილებელია, შეიქმნას ფილტრი, ვიდრე იუსტიციის უმაღლესი საბჭო კანდიდატურებს შეარჩევს. მნიშვნელოვანია, შემუშავდეს ინტერესთა კონფლიქტის სტანდარტები. მიმაჩნია, რომ გიორგი მიქაუტაძე და დიმიტრი გვრიტიშვილი არ უნდა იყვნენ კანდიდატურები, რადგან ისინი არიან საბჭოს წევრები, აქ არის ინტერესთა კონფლიქტი. მდივანი თავის თავს არ უნდა ასახელებდეს კანდიდატურად", — განაცხადა ნაზი ჯანეზაშვილმა.

საქართველოს პარლამენტის თავმჯდომარემ, ირაკლი კობახიძემ იუსტიციის უმაღლესი საბჭოს მდივნათან, გიორგი მიქაუტაძესთან შეხვედრის შემდეგ განაცხადა, რომ უზენაესი სასამართლოს მოსამართლეებს იქამდე არ აირჩევენ, სანამ კანდიდატების შერჩევისა და წარდგენის კრიტერიუმები არ გაიწერება. მან ასევე განმარტა, რომ შემუშავებული კრიტერიუმები იმ მოსამართლეობის კანდიდატებზეც გავრცელდება, რომელთა სიაც უკვე პარლამენტშია. ირაკლი კობახიძის თქმით, კანდიდატების შერჩევის კრიტერიუმებსა და პროცედურებზე სასამართლო რეფორმის სამუშაო ჯგუფში იმსჯელებენ.

მიუხედავად იმისა, რომ დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა შეარჩიოს, უზენაესი სასამართლოს მოსამართლეობის 10 კანდიდატი უკვე წარდგენილია. ამის გამო, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ. გიორგი მიქაუტაძის თქმით, ყველა მოსამართლე მზად არის გაიაროს ის კრიტერიუმები, რომელსაც პარლამენტი შეიმუშავებს.

"უზენაეს სასამართლოში უნდა იყოს მინიმუმ 28 მოსამართლე. დღეს არის მოქმედი 10 მოსამართლე. წარდგენილია - 10. ბუნებრივია, რომ ეს წარმოდგენილი 10 კანდიდატურა არაა საკმარისი. კიდევ იქნება. რა თქმა უნდა, იუსტიციის საბჭოს აქვს რესურსი პარლამენტს კიდევ წარმოუდგინოს კანდიდატურები, ეს საჭიროებაც არსებობს და ბუნებრივია ასე იქნება", — განაცხადა მიქაუტაძემ.

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

ამავე თემაზე: