UEFA ფიქრობს, რომ საქართველოს ნაკრებისა და ბელგიის გენტის ნახევარმცველი გიორგი ჩაკვეტაძე ერთ-ერთია იმ 50 ფეხბურთელიდან, რომელსაც 2019 წელს ყურადღება უნდა მივაქციოთ. UEFA-მ 21 წლამდე ასაკის 50 ყველაზე პერსპექტიული ფეხბურთელის სია პირველ იანვარს გამოაქვეყნა.

UEFA ჩაკვეტაძეზე წერს, რომ ის არის შემტევი ნახევარმცველი მაღალი ტემპითა და მოხერხებული ფეხებით. მას უკვე უწოდეს "ქართველი კაკა".

ჩაკვეტაძემ 2018 წელს ეროვნულ გუნდში, 7 მატჩში 5 გოლი გაიტანა. ის 2018 წელს საქართველოს საუკეთესო ფეხბურთელად აღიარეს, ხოლო გერმანულმა სააგენტომ Transfermarkt.de-მ 2018 წლის ბოლოს ტოპ 15 ლიგის 20 წლამდე საუკეთესო მოთამაშეთა შორის დასახელა.