საქართველოს ეროვნულ ნაკრებში არაერთი გამორჩეული მოთამაშეა. მათ წელს ქართველ გულშემატკივარს უდიდესი სიხარული აჩუქეს, როდესაც ჯერ მსოფლიო ჩემპიონატზე გავიდნენ, შემდეგ კი 16 საუკეთესო გუნდს შორის მოხვდნენ. ჩვენი გუნდი სავსეა გამორჩეული მოთამაშეებით. ამ სტატიაში ვეცდებით მოკლედ შევეხოთ რამდენიმეს და თქვენც გაგაცნოთ.

გიორგი შერმადინი

გიორგი სიმაღლეში 2 მეტრი და 17 სანტიმეტრია. ის ესპანეთის ლიგის მოქმედი MVP-ა. საინტერესოა, რომ 2006 წელს, როდესაც 17 წლის გიორგი ეროვნულ გუნდს შეუერთდა,ის გახდა ყველაზე ახალგაზრდა კალათბურთელი, ვინც საქართველოს ძირითად ნაკრებში მოხვედრილა. გიორგის სათამაშო სტილში აღსანიშნავია ის ფაქტი, რომ ის სამქულიანებს არასდროს ისვრის. მისი მთავარი კოზირი ფარქვეშ თამაშია. ქართველი ცენტრი იდეალურთან მიახლოებულად ისვრის საჯარიმო სროლებს.

სანდრო მამუკელაშვილი

სანდრო მამუკელაშვილი NBA-ს მოქმედი კალათბურთელია. ის სან ანტონიო სპერსში ასპარეზობს. მისი სიმაღლე 2 მეტრი და 8 სანტიმეტრია. იმის ფონზე, რომ სანდრო მძიმე ფორვარდად მიიჩნევა, იგი ძალიან ათლეტური და მოქნილია. კარგად შეუძლია ბურთის ტარება, სამიანების სროლა, საშუალო მანძილიდან სროლა, შესვლა და ჩატენვა. მოკლედ შეგვიძლია ვთქვათ, რომ სანდრო მამუკელაშვილი იმ იშვიათ კალათბურთელებს შორისაა, რომელსაც შეტევის ყველა კომპნონენტი ძალიან კარგი აქვს. ეს ყველაფერი მან ამ მსოფლიო ჩემპიონატზეც არაერთხელ გვაჩვენა.

გიორგი ცინცაძე

გიორგი ცინცაძე საქართველოს ნაკრების ლეგენდარული გამთამაშებელია. მას ხშირად მოიხსენიებენ მეტსახელით - ბუ. ის უკვე 37 წლისაა, თუმცა, ფაქტობრივად, ნაკრების არცერთ მატჩს არ ტოვებს და დღემდე უამრავ დასამახსოვრებელ მომენტს გვჩუქნის. როგორც წესი, გიორგი ისვრის სამქულიანებს და ხშირად ორ ნაბიჯში შედის. მისი თამაშის მთავარი გამორჩეული ნაწილი არის ის, რომ გიორგი ცინცაძეს აქვს ძალიან კარგი მოედნის ხედვა და ბევრ ლამაზ ასისტს აკეთებს. მისი პასი 2015 წლის ევრობასკეტზე, ლიეტუვის ნაკრების წინააღმდეგ FIBA-მ ათწლეულის საუკეთესო ასისტად დაასახელა.

მიხეილ ბერიშვილი

მიუხედავად იმისა, რომ მიშა ბერიშილი ბევრს არ თამაშობს, მისი ხსენება მაინც აუცილებელია. თანამედროვე გუნდებისთვის მნიშვნელოვანია გუნდში კარგი „სნაიპერი“ ჰყავდეს, რათა სამქულიანიდან აქტიურად შეუტიო. მიშა ამ კრიტერიუმს იდეალურად აკმაყოფილებს. ბერიშვილი გამოირჩევა იმით, რომ გუნდში სამქულიანების საუკეთესო თუ არა, ერთ-ერთი საუკეთესო მსროლელია. გაიხსენეთ მსოფლიო ჩემპიონატის შესარჩევი ეტაპი. მატჩებში, რომლებშიც მიშამ მონაწილეობა მიიღო, 2-3 სამქულიანი მუდმივად ჩააგდო.

რატი ანდრონიკაშვილი

რატი საქართველოს ნაკრების გამთამაშებელია. ის ეროვნულ გუნდს 2019 წელს შეუერთდა და გულშემატკივრების გულები იმედით აავსო, რადგან გიორგი ცინცაძის გზის გამგრძელებელი გამოჩნდა. მისი კოზირი მისი სისწრაფეა. შეუძლია ორ ნაბიჯში კარგად შესვლა და ასისტების დარიგება. ის დაცვაში ბრწყინვალედ თამაშობს. მისი დაცვითი თამაში შესარჩევ ეტაპზე ესპანეთის ნაკრების წინააღმდეგ ძალიან მნიშვნელოვანი იყო.

ქართველი გულშემატკივარი ამაყია, რომ ამდენი გამორჩეული კალათბურთელი ჰყავს. გახსოვდეთ, ჩვენმა ბიჭებმა ისტორია დაწერეს! საქართველოს ნაკრები, რომლის მთავარი მხარდამჭერიც საქართველოს ბანკია, მსოფლიოს საუკეთესო 16 გუნდს შორის მოხვდა.