იუსტიციის უმაღლესი საბჭოს მოსამართლე წევრის, სერგო მეთოფიშვილის თქმით, დეპუტატი ეკა ბესელია სასამართლო სისტემაში თავისი ხალხის შეყვანას ცდილობს.

"ამ ეტაპზე მე ვგულისხმობ ქალბატონ ეკა ბესელიას, ბატონ ლევან გოგიჩაიშვილსა და მისნაირ პოლიტიკოსებს. ესენი ცდილობენ, რომ სასამართლო სისტემაში შეიყვანონ თავიანთი ხალხი და ამით, ალბათ, ცდილობენ დაიმორჩილონ სასამართლო სისტემა", — განაცხადა მეთოფიშვილმა.

საბჭოს კიდევ ერთი მოსამართლე წევრისა და უზენაესი სასამართლოს კანდიდატის, დიმიტრი გვრიტიშვილის თქმით, დეპუტატი ლევან გოგიჩაიშვილი "მუქარაზეა გადასული". მისივე შეფასებით, გაურკვეველია ვის გულისხმობს ბესელია მიხეილ სააკაშვილის რეჟიმის მომსახურე მოსამართლეებად და მისი ეს განცხადება დისკრიმინაციულია.

იურიდიულ საკითხთა კომიტეტის თავმჯდომარე, ეკა ბესელია თანამდებობიდან 27 დეკემბერს გადადგა. მისი თქმით, ამით უზენაესი სასამართლოს მოსამართლეების დამტკიცებას შეუშალა ხელი. მისი განმარტებით, ის მას შემდეგ გადადგა, რაც მისმა მოადგილემ, ვანო ზარდიაშვილმა თანამდებობების დატოვების მოთხოვნით მიმართა. ბესელიას გადადგომის შემდეგ ზარდიაშვილს მოუწევდა ამ თანამდებობაზე მუშაობა.

იუსტიციის უმაღლესმა საბჭომ უზენაესი სასამართლოს მოსამართლეობის 10 კანდიდატი წარადგინა. ამის მიუხედავად, დღემდე არ არსებობს პროცედურა, რომლითაც იუსტიციის უმაღლესმა საბჭომ მოსამართლეობის კანდიდატები უნდა წარადგინოს. ამ მიზეზით, არასამთავრობო ორგანიზაციების ნაწილსა და საბჭოს არამოსამართლე წევრებს პროცესის ობიექტურობასა და მიუკერძოებლობაზე კითხვები უჩნდებათ.

ეკა ბესელიას გადადგომას მმართველ გუნდში დაპირისპირება მოჰყვა. პარლამენტის თავმჯდომარის, ირაკლი კობახიძის თქმით, ბესელიას გადადგომის მიზეზები პარტიის შიდა სამზარეულოა, რომელსაც ნაწილობრივ გარეთ გამოიტანეს.

ამავე თემაზე: სასამართლოს სუიციდად შეფასებული გადაწყვეტილება და უვადო მოსამართლეობის 10 კანდიდატი