ჭყონდიდის მიტროპოლიტი, მეუფე პეტრე აცხადებს, რომ მხარს უჭერს უკრაინის ეკლესიისთვის ავტოკეფალიის მინიჭების საკითხს. ეს განცხადება მიტროპოლიტმა სინოდის სხდომის დაწყებამდე გააკეთა.

მისი თქმით, სხდომის დღის წესრიგი არ იცის, თუმცა ფიქრობს, რომ ძალიან ბევრი პრობლემური საკითხი დაგროვდა.

"იმდენი პრობლემური საკითხია განსახილველი საქართველოს ეკლესიაში დღევანდელი სხდომა არ ეყოფა და რამდენიმე დღე უნდა გაგრძელდეს", — განაცხადა მეუფე პეტრემ.

მისი თქმით, ამ სხდომაზე ციანიდის საკითხსაც დააყენებს, რადგან სურს იმხილოს "უსამართლობა და ცინიზმი საქართველოს პროკურატურასა და სასამართლოში".

მეუფე პეტრე უკრაინის ეკლესიის საკითხსაც გამოეხმაურა და თქვა, რომ "დღეს თუ ხვალ ეკლესია უნდა დადგეს სიმართლის მხარეს".

"მე პირადად მიმაჩნია, რომ განვითარებული პროცესები უკრაინის სახელმწიფოებრიობისთვისა და მართლმადიდებელი სამყაროსთვის ისტორიული მოვლენაა, ძალიან გასახარია და ღვთის წყალობაა, რომ უკრაინაში განხეთქილების არაღიარებული ეკლესია არ იქნება", — განაცხადა მეუფე პეტრემ.

საპატრიარქოში საქართველოს მართლმადიდებელი ეკლესიის წმინდა სინოდის სხდომა მიმდინარეობს.

სხდომის დღის წესრიგი წინასწარ ცნობილი არ არის, თუმცა ვრცელდება ინფორმაცია, რომ სხდომაზე უკრაინის ეკლესიის ავტოკეფალიის მხარდაჭერის საკითხს განიხილავენ.

ჯერ ცნობილია ბოდბელი ეპისკოპოსის, პატრიარქის ქორეპისკოპოსი იაკობის, დმანისისა და აგარაკ-ტაშირის, დიდი ბრიტანეთისა და ირლანდიის მთავარეპისკოპოსი ზენონის, ჭყონდიდელი მიტროპოლიტი პეტრეს, ცურტაველი მიტროპოლიტი ვახტანგის, ბელგიისა და ჰოლანდიის ეპისკოპოსი დოსითეოზის, მარგვეთისა და უბისის ეპისკოპოსი მელქისედეკის, შემოქმედელი ეპისკოპოსი იოსების პოზიცია, რომლებიც მხარს უჭერენ უკრაინის ეკლესიის ავტოკეფალიას.

სინოდი წელიწადში ორჯერ იკრიბება. ბოლო სხდომა სინოდმა 21 ივნისს გამართა.

უკრაინის ეკლესიის ავტოკეფალია და საქართველო

კიევის პატრიარქი უკრაინის ეკლესიის ავტოკეფალიის საკითხზე საქართველოს მხარდაჭერას ელოდება.

"საქართველოს ეკლესიას უნდა ახსოვდეს თავისი ისტორია", — განაცხადა კიევის პატრიარქმა, ფილარეტმა. როგორც ცნობილია, კიევის პატრიარქს საქართველოს კათოლიკოს-პატრიარქთან საუბარი არ ჰქონია.

საქართველოს საპატრიარქომ პოზიციის დაფიქსირებას თავის შეკავება არჩია. ამის მიზეზად კი ის დაასახელა, რომ კანონიკური სამართლის ნორმებზე დაფუძნებული თითოეული მხარის ოფიციალურ და საბოლოო პოზიციას ელოდება.

პატრიარქის მდივნის, მიქაელ ბოტკოველის განცხადებით, სინოდის სხდომა გადაწყვეტს რა პოზიცია ექნება საქართველოს უკრაინის ეკლესიის ავტოკეფალიასთან მიმართებაში. თუმცა მისივე თქმით, ოკუპაციის პირობებში კონსტანტინოპოლის ეკლესიის უპირობო მხარდაჭერა არასწორია.

უკრაინის ეკლესიის ავტოკეფალია

კონსტანტინოპოლის წმინდა სინოდმა უკრაინის ეკლესიის ავტოკეფალიის მინიჭების პროცესი დაიწყო. კონსტანტინოპოლის განცხადების თანახმად, გაუქმდა 1686 წელს სინოდის მიერ მიღებული გადაწყვეტილება, რომელიც მოსკოვის საპატრიარქოს ნებას რთავდა კიევის სამიტროპოლია საკუთარ დაქვემდებარებაში მოექცია.

ავტოკეფალიის აღიარების საპასუხოდ, რუსეთის მართლმადიდებელმა ეკლესიამ და უკრაინის მართლმადიდებელი ეკლესიის მოსკოვის საპატრიარქომ კონსტანტინოპოლის ეკლესიასთან ევქარისტული კავშირი სრულად გაწყვიტა. როგორც რუსული ეკლესიის წარმომადგენელმა განაცხადა ეს იძულებითი გადაწყვეტილება იყო და იმედი აქვთ კონსტანტინოპოლი აზრს შეიცვლის.

კიევის პატრიარქმა ფილარეტმა განაცხადა, რომ ავტოკეფალიის საკითხში საქართველოს მართლმადიდებელი ეკლესიის საპატრიარქოს მხარდაჭერის იმედი აქვს. თუმცა, საქართველოს საპატრიარქომ პოზიციის დაფიქსირებას თავის შეკავება არჩია. თავდაპირველად საპატრიარქომ ამის მიზეზად ის დაასახელა, რომ კანონიკური სამართლის ნორმებზე დაფუძნებული თითოეული მხარის ოფიციალურ და საბოლოო პოზიციას ელოდებოდა.

უკრაინის და საქართველო

ავტოკეფალიის საკითხში კიევის პატრიარქი საქართველოს მხარდაჭერას ელოდება.

"საქართველოს ეკლესიას უნდა ახსოვდეს თავისი ისტორია", — განაცხადა კიევის პატრიარქმა, ფილარეტმა. როგორც ცნობილია, კიევის პატრიარქს საქართველოს კათოლიკოს-პატრიარქთან საუბარი არ ჰქონია.

საქართველოს საპატრიარქომ პოზიციის დაფიქსირებას თავის შეკავება არჩია. ამის მიზეზად კი ის დაასახელა, რომ კანონიკური სამართლის ნორმებზე დაფუძნებული თითოეული მხარის ოფიციალურ და საბოლოო პოზიციას ელოდება.

პატრიარქის მდივნის, მიქაელ ბოტკოველის განცხადებით, სინოდის სხდომა გადაწყვეტს რა პოზიცია ექნება საქართველოს უკრაინის ეკლესიის ავტოკეფალიასთან მიმართებაში. თუმცა მისივე თქმით, ოკუპაციის პირობებში კონსტანტინოპოლის ეკლესიის უპირობო მხარდაჭერა არასწორია.