თბილისის მერმა, კახა კალაძემ კიდევ ერთხელ გაიმეორა იმ განცხადების შინაარსი, რომლითაც რამდენიმე დღის წინ გაერთიანებულ ოპოზიციას მიმართა.

რუსთავი 2-კითხვაზე იტყოდა თუ არა დღესაც იმავეს, რაც გრიგოლ ვაშაძეზე რამდენიმე დღის წინ თქვა, კალაძემ უპასუხა:

"კი, კი ახლაც ეგრე ვიტყოდი, მართლა იმ სახელმწიფოს რა ვუთხარი, გრიგოლა ვაშაძე რომ დაამხობს რა, გადაატრიალებს... კანონის წინაშე ყველა ვართ თანასწორები ვიხილეთ კადრები, როგორ ჩხუბობდა და ურტყამდა პოლიციელს, რა თქმა უნდა, ეს არის სისხლის სამართლის დანაშაული, ეს არის კანონდარღვევა და კანონის წინაშე ყველას მოუწევს პასუხისგება", — ამბობს კალაძე.

პარტია ქართული ოცნების გენერალური მდივანი, კახა კალაძე გაერთიანებული ოპოზიციის მიერ უწყვეტი აქციების დანონსებას ასე გამოეხმაურა: "იმ სახელმწიფოს დედა ვატირე გრიგოლა ვაშაძე გადატრიალებას რომ მოაწყობს, გადატრიალდნენ საკუთარ სახლებში".

18 დეკემბრიდან გაერთიანებული ოპოზიცია "უწყვეტ" აქციებს აანონსებს. გრიგოლ ვაშაძის განცხადებით, საქართველოს ხელისუფლებამ მოპარული არჩევნების შემდეგ მოქალაქეების კონსტიტუციური უფლებები შეზღუდა.

16 დეკემბერს ინაუგურაციის პარალელურად ხმაური იყო თბილისი-კახეთის გზაზე. ერთმანეთს გაერთიანებული ოპოზიციის წევრები და პოლიცია დაუპირისპირდა. სოფელ ველისციხეში მდგომარეობა მას შემდეგ დაიძაბა, რაც გაერთიანებულ ოპოზიციას გზა გადაუკეტა პოლიციამ და თელავში ჩასასვლელად ყვარლის შემოვლითი გზით წასვლა ურჩია. ამ გზაზე ოპოზიციას ავტობუსები ელოდებოდნენ, რომლებიც აქციის მონაწილეებს თელავის მერიის მიერ პროტესტისთვის განსაზღვრულ ადგილზე გადაიყვანდნენ.

გაერთიანებული ოპოზიციის პოზიციით, შსს-მ შეზღუდა კონსტიტუციური უფლება, გამოხატვის თავისუფლება. შსს-სა და ქართული ოცნების წარმომადგენლები კი ერთხმად აცხადებდნენ, რომ გაერთიანებულმა ოპოზიციამ პროვოკაცია მოაწყო და მათთვის თელავში ჩამოსვლა და აქციის ჩატარების უფლება არავის შეუზღუდავს. დაპირისპირების შედეგად დაშავდნენ, როგორც პოლიციელები ისე აქციის მონაწილეები.

საქართველოს მეხუთე პრეზიდენტის სალომე ზურაბიშვილის ინაუგურაციის დასრულების შემდეგ, შინაგან საქმეთა მინისტრმა განაცხადა, რომ დაისჯება ყველა, ვისი ბრალეულობაც გამოიკვეთება. საბოლოოდ, სალომე ზურაბიშვილის ინაუგურაციის პარალელურად ოპოზიციის დაგეგმილი აქცია არ ჩატარდა.