საქართველოს მეხუთე და ბოლო არჩეული პრეზიდენტის, სალომე ზურაბიშვილის ინაუგურაციის ცერემონიას მსოფლიო პრეზიდენტებიდან მხოლოდ სომხეთის პრეზიდენტი არმენ სარქისინია დაესწრება. საქართველოს საგარეო საქმეთა სამინისტროს ცნობით, ინაუგურაციის მონაწილეობას მსოფლიოს 55-მდე ქვეყნის 150-მდე წარმომადგენელი მიიღებს.

უწყების ცნობით, საქართველოს ეწვევიან მაღალი რანგის სტუმრები 20-ზე მეტი ქვეყნიდან და 16 საერთაშორისო ორგანიზაციის წარმომადგენელი. სამინისტროს განმარტებით, ეს არ არის საბოლოო მონაცემები, რადგან სახელმწიფოებს შორის ინფრომაციას ამ დრომდე ცვლიან.

დღევანდელი მონაცემებით ინაუგურაციის ცერემონიალს დაესწრება:

  • სომხეთის რესპუბლიკის პრეზიდენტი არმენ სარქისიანი;
  • საფრანგეთის ყოფილი პრეზიდენტი (2007-2012 წწ) ნიკოლა სარკოზი და თავდაცვის ყოფილი მინისტრი და და სოციალურ საქმეთა ყოფილი მინისტრი;
  • თურქეთის რესპუბლიკის ვიცე-პრეზიდენტი;
  • აზერბაიჯანის პარლამენტის სპიკერი;
  • სებეთის ეროვნული ასამბლეის სპიკერი;
  • ჩეხეთის რესპუბლიკის სენატის პრეზიდენტი;
  • ლიეტუვას სეიმის სპიკერი;
  • პოლონეთის სენატის მარშალი და პრეზიდენტის კანცელარიის ხელმძღვანელი, მინისტრი;
  • მოლდოვას ვიცე პრემიერ-მინისტრი;
  • თურქმენეთის ვაჭრობისა და საგარეო ეკონომიკური ურთიერთობების მინისტრი;
  • გაერთიანებული არაბეთის საემიროების კლიმატის ცვლილებისა და გარემოს მინისტრი;
  • ბელარუსის რესპუბლიკის ეროვნული ასამბლეის საბჭოს თავმჯდომარის მოადგილე;
  • ისრაელის კნესეტის (პარლამენტი) ვიცე-სპიკერი და საგარეო საქმეთა მინისტრის პირველი მოადგილე;
  • სუამის გენერალური მდივანი;
  • უკრაინის საგარეო საქმეთა მინისტრის მოადგილე;
  • ყირგიზეთის საგარეო საქმეთა მინისტრის მოადგილე;
  • აშშ-დან USAID-ის წარმომადგენელი;
  • წმინდა საყდრის საგანგებო ემისარი, არქიბიშოპი.


ინაუგურაციის ღონისძიების ფარგლებში საქართვეში ჩამოსული მაღალი რანგის სტუმრები საქართველოში ვიზიტის ფარგლებში გამართავენ სამუშაო შეხვედრებს საქართველოს პრეზიდენტთან, აღმასრულებელი და საკანონდებლო ხელისუფლების წარმომადგენლებთან.

საქართველოს მეხუთე პრეზიდენტის, სალომე ზურაბიშვილის ინაუგურაცია თელავში, ერეკლე მეფის სასახლეში 16 დეკემბერს გაიმართება. საქართველოს მთავრობამ გამოსცა დადგენილება და გამოყო გუნდი, რომელიც ზურაბიშვილის ინაუგურაციის რეჟისურასა და დეტალებზე ისაუბრებს. ინაუგურაციის ცერემონია ერეკლე მეორის სასახლეში ჩატარდება და მას საერთაშორისო ლიდერებიც დაესწრებიან. ცნობილია, რომ ინაუგურაციას დაესწრება საქართველოს მეოთხე პრეზიდენტი, გიორგი მარგველაშვილიც.

სალომე ზურაბიშვილმა თელავში არჩევნები წააგო. მისი თქმით, სწორედ ამის გამო გადაწყვიტა ინაუგურაცია არა რეგლამენტით განსაზღვრულ ადგილზე, არამედ თელავში გაემართა. რეგლამენტით პრეზიდენტის ინაუგურაცია საქართველოს პარლამენტის ეზოში უნდა ჩატარებულიყო, თუმცა მთავრობამ ახალი განკარგულება გამოსცა და ახალ პრეზიდენტს გადაწყვეტილების მიღების თავისუფლება მისცა.

ინაუგურაციის პარალელურად თელავში გაერთიანებული ოპოზიციის აქცია გაიმართება. თელავის მერია კი ინაუგურაცისთან დაკავშირებით 14, 15 და 16 დეკემბერს 13:00 საათიდან 15:00 საათამდე ქვემეხებიდან ერთობლივად გაისვრის.