საქართველოს მომავალი პრეზიდენტის, სალომე ზურაბიშვილის განცხადებით, ინაუგურაციისთვის ქალაქი თელავი ორი მიზეზით შეარჩია. პირველი, ის რომ მისი წინასაარჩევნო კამპანია რეგიონის გაძლიერებაზე იყო ორიენტირებული, მეორე კი თელავში არჩევნების წაგებას უკავშირდება.

სალომე ზურაბიშვილმა განმარტა, რომ რამდენიმე სცენარი განიხილებოდა და თელავი მისი აზრი იყო.

"ჩემი მთელი წინასაარჩევნო კამპანია იყო ამ თემაზე რომ ჩვენ უნდა რეგიონები ამოვწიოთ, რომ განვითარდეს რეგიონები, იმიტომ რომ რეგიონების განვითარების არ იქნება საქართველოს განვითარება და მე ვთვლი რომ ძალიან სწორი არჩევანი არის თელავი", — განაცხადა ზურაბიშვილმა.

მისივე თქმით, თელავზე არჩევანის გაკეთება სხვა რეგიონებისთვის საწყენი არ უნდა იყოს.

"მეორე მიზეზი იყო რატომაც, მე არჩევანი გავაკეთე თელავზე და ეს არავისთვის საწყენი არ არის სხვა რეგიონებიდან, ეს იმიტომ, რომ თელავმა არ მომცა ხმა, ეს არის ერთ-ერთი წაგებული ადგილი და მინდა ამით ვაჩვენო, რომ მე ვარ ყველას პრეზიდენტი, თუნდაც იმ ადამიანების რომლებმაც მე ხმა არ მომცეს", — განაცხადა სალომე ზურაბიშვილმა.

სალომე ზურაბიშვილის ინაუგურაცია უკვე ცნობილია, რომ თელავში გაიმართება. ეს ქალაქი იმ ოლქის საზღვრებშია, სადაც ზურაბიშვილმა არჩევნების მეორე ტური წააგო.

სალომე ზურაბიშვილმა სულ სამ ოლქში წააგო.

წაგებული ოლქები

თელავი

  • ზურაბიშვილი — 48,81%;
  • ვაშაძე — 51,19%.

რუსთავი

  • ზურაბიშვილი — 48,49%.
  • ვაშაძე — 51,51%.

საზღვარგარეთ

  • ზურაბიშვილი — 35,76%;
  • ვაშაძე — 64,24%.

საქართველოს არჩეული პრეზიდენტის, სალომე ზურაბიშვილის ინაუგურაცია 16 დეკემბერს გაიმართება. ქვეყნის ახალი პრეზიდენტის მიერ ფიცის დადების ცერემონია, კონსტიტუციის მიხედვით, პრეზიდენტის არჩევის დღიდან მესამე კვირა დღეს იმართება. სალომე ზურაბიშვილის მიერ პრეზიდენტის ფიცის დადებისთანავე წყდება მოქმედი პრეზიდენტის, გიორგი მარგველაშვილის უფლებამოსილება.

საქართველოს ცენტრალურმა საარჩევნო კომისიამ ხმების 100 პროცენტი დათვალა. ამ მონაცემებით, პრეზიდენტი სალომე ზურაბიშვილი ხდება.

პრეზიდენტობის კანდიდატებს შორის ხმები პროცენტულად ასე გადანაწილდა:

  • ზურაბიშვილი — 59,52%;
  • ვაშაძემ — 40,48%.