გრიგოლ ვაშაძის მხარდამჭერები აქციას თელავში 16 დეკემბერს სალომე ზურაბიშვილის ინაუგურაციის დროს გამართავენ. ამის შესახებ გრიგოლ ვაშაძემ ბრიფინგზე განაცხადა.

"ნუ დაიწყება ვაი-ვიში, პანიკის გამოხატვა, ინაუგურაციის ადგილის ცვლილება, არავინ არავის არ ერჩის. ჩვენ გვინდა ხელისუფლებამ კიდევ ერთხელ გაიგოს განრისხებული ხალხის ხმა", — თქვა ვაშაძემ.

მისი თქმით, მშვიდობიანი აქცია გაიმართება თბილისში და სხვა ქალაქებშიც, თუმცა არ დააკონკრეტა სად. ვაშაძის თქმით, აქცია ქალაქის იმ ადგილას გაიმართება, რომელსაც მათ მუნიციპალიტეტი გამოუყოფს.

ვაშაძემ ისაუბრა ნატო-ს გენერალური მდივნის სპეციალურ წარმომადგენელთან, ჯეიმს აპატურაისთან შეხვედრაზეც. მისი თქმით, შეხვედრის დღის წესრიგი გაწერილი არ აქვს და მასთან საუბარს არჩევნების გაყალბებაზე აპირებს.

საპრეზიდენტო არჩევნების მეორე ტურში დამარცხებული გრიგოლ ვაშაძე და გაერთიანებული ოპოზიცია საპრეზიდენტო არჩევნების მეორე ტურის შედეგებს არ აღიარებენ. მათი პოზიციით, არჩევნებზე გაყალბების უპრეცედენტო მაჩვენებელი დაფიქსირდა.

ოპოზიცია რიგგარეშე საპარლამენტო არჩევნების ჩატარებასა და საარჩევნო კოდექსში ცვლილებებს ითხოვს. ვაშაძემ მმართველ ძალას სამუშაო ჯგუფის შექმნისკენაც მოუწოდა, თუმცა ხელისუფლებამ მისი შეთავაზება არ მიიღო. ოპოზიციამ ხელისუფლებას ვადა 16 დეკემბრამდე, ანუ ინაუგურაციამდე მისცა. სწორედ ამ დღეს დააანონსეს მათ მორიგი აქციაც.