დამამცირებელი და არაადამიანური მოპყრობისთვის ბრალდებული, მარნეულის ყოფილი მერი, თემურ აბაზოვი აცხადებს, რომ "ბინძური პროვოკაციის მსხვერპლია". აბაზოვი 13 დეკემბერს აღკვეთის ღონისძიება პატიმრობა 10 000-ლარიანი გირაოთი შეუცვალა.

"ვინაიდან ერთ-ერთმა მოწმემ როგორც განაცხადა, ეს იყო იმისთვის გაკეთებული, რომ მას ასეთი ბინძური გინებითა და ოჯახის შეურაცხყოფით უნდოდა ნაციონალურ მოძრაობაში გადასვლა. რეალურად ეს ადამიანი იყო ქართული ოცნების წარმომადგენელი. მე მსჯავრდებული არ ვყოფილვარ, მე ვიყავი ბრალდებული. მინდა, საჩივარი შევიტანო ცილისწამების გამო", — განაცხადა აბაზოვმა რუსთავი 2-თან.

თემურ აბაზოვი არაადამიანური მოპყრობის ბრალდებით მიმდინარე წლის 13 ივნისს დააკავეს მას შემდეგ, რაც სტუდია მონიტორის გამოძიება გავრცელდა. მასალაში ასახული იყო, რომ მოქალაქე, რომელმაც საქართველოს ყოფილ პრემიერს, ბიძინა ივანიშვილისა და მარნეულის მერს, თემურ აბაზოვს აგინა, ძალადობის მსხვერპლი გახდა.

"გავრცელდა ვიდეოები, სადაც ეს მოქალაქე ბოდიშს იხდის და სახეზე, სავარაუდოდ, შარდს ისვამს", - აღნიშნულია სტუდია მონიტორის მიერ გავრცელებულ მასალაში.

ამავე მოქალაქეზე ცემის ბრალდებით სისხლის სამართლებრივი დევნა დაიწყო პარლამენტის წევრის, პარტია ერთიანი ნაციონალური მოძრაობიდან — აზერ სულეიმანოვის, მარნეულის მუნიციპალიტეტის საკრებულოს წევრის, პარტია ქართული ოცნებიდან — რამინ ალახვერდიევის და მარნეულის მერის ნათესავის, მოქალაქე ე.გ-ს მიმართ.