დღეს, 14 ივნისს რუსთავის საქალაქო სასამართლო მარნეულის მერის თემურ აბაზოვისთვის აღკვეთის ღონისძიების შეფარდებაზე მსჯელობს. სხდომაზე ბრალდებულმა მერმა სიტყვის უფლებით ისარგებლა და განაცხადა, რომ უდანაშაულოა:

"არასოდეს, არც ერთხელ კანონი არ დამირღვევია. მე მინდა ისე სუფთად გამოვიდე, როგორი სუფთაც ვარ. ეს ხელისუფლება იქნება, სხვა ხელისუფლება თუ 30 წელი გავა, მე ვიყო სუფთა და არ მქონდეს რაღაც დასაბრუნებელი. ეს იყო 1000-პროცენტიანი პროვოკაცია. შეცდომა არ იქნება თუ გარეთ ვიქნები, თუ ჩემს შვილებთან ერთად ვიქნები".

მარნეულში მომხდარი ძალადობის ფაქტზე, პროკურატურა აცხადებს, რომ პირს, რომელმაც აქციაზე მარნეულის მერსა და ბიძინა ივანიშვილს აგინა, თემურ აბაზოვმა სახეში შეაფურთხა, მიაყენა ფიზიკური შეურაცხყოფა, აიძულა მოეშარდა ჭიქაში და შარდით მოებანა სახე.

ამ ფაქტის ამსახველი ვიდეომასალა სტუდია მონიტორმა 12 ივნისს გაავრცელა.

თემურ აბაზოვი არაადამიანური მოპყრობის ბრალდებით, გუშინ 13 ივნისს დააკავეს. მას 5-დან 10 წლამდე პატიმრობა ემუქრება.