Annenberg-ის საგანმანათლებლო ცენტრის ერთ-ერთი კვლევის თანახმად, 2014 წლის 100 ყველაზე წარმატებული ფილმის პერსონაჟების მხოლოდ 28,1 პროცენტი იყო ქალი.

ამას წლების განმავლობაში იმით ხსნიდნენ, რომ თითქოს ქალ პერსონაჟებზე მაყურებლის მხრიდან მოთხოვნა ნაკლებია, რაც საბოლოოდ შემოსავლებზეც აისახებოდა.

საბედნიეროდ, CAA-ის ახალმა კვლევამ საპირისპირო დაადასტურა.

აღმოჩნდა, რომ მაყურებელს უყვარს ფილმები ქალი მთავარი პერსონაჟებით. მეტიც, ასეთ ფილმებს ხშირად იმაზე გაცილებით მაღალი შემოსავალი აქვთ, ვიდრე სურათს, რომელშიც წამყვანი პერსონაჟი კაცია.

კომპანია დასკვნას 2014 - 2017 წლებში გამოსული 350 ყველაზე მაღალშემოსავლიანი ფილმების ბოქს ოფისებზე დაყრდნობით ამბობს.

ამ ფილმებიდან 105-ში მთავარი როლი ქალს ჰქონდა, დანარჩენში კი კაც მსახიობს.

ანალოგიური დასკვნის გაკეთება შეიძლება დისნეის მაგალითზეც. მაღალშემოსავლიანი ფილმების უმრავლესობაში, წამყვანი პერსონაჟები ძირითადად ქალები არიან.

გარდა ამისა, ამავე კვლევის თანახმად, ფილმები რომლებშიც მთავარ როლებს სხვადასხვა რასის მსახიობები ასრულებენ, ხშირად ფინანსურად უფრო წარმატებულია.

CAA-ში აღნიშნავენ, რომ ბოლო პერიოდში განსაკუთრებულად იზრდება მთავარი ქალი პერსონაჟების რიცხვი კინოში, თუმცა ამ კუთხით გასაკეთებელი კიდევ ბევრია, ამისთვის კი ისინი აქტიურად თანამშრომლობენ Time’s Up კამპანიასთან.