დაახლოებით ერთი საათის წინ, 18 საათზე ვებგვერდი Vali.Ge უნდა ჩართულიყო, თუმცა ის ამ დრომდე არ არის ხელმისაწვდომი. ვებგვერდის ამუშავების ზუსტი დრო უცნობია, თუმცა ცნობილია რამდენიმე დეტალი.

რა არის Vali.Ge

Vali.Ge — ეს არის ვებგვერდი, სადაც მოქალაქეებს შეუძლიათ გადაამოწმონ ე.წ. ვალების განულების პროგრამაში მონაწილეობენ თუ არა. მართალია, ვებგვერდი ქართუს სახელზეა რეგისტრირებული და პროექტსაც ის ახორციელებს, თუმცა ინფორმაციას პრემიერი, მამუკა ბახტაძე აჟღერებს.

ამ ეტაპზე ვებგვერდზე 670 442 მონაცემია შეყვანილი.

ვის გაუნულდება ვალი

19 ნოემბრის საგანგებო ბრიფინგზე პრემიერმა მამუკა ბახტაძემ ე.წ. შავ სიაში მყოფი 600 ათასი ადამიანისთვის ჯამში 1,5 მილიარდი ლარის ვალის განულებაზე ისაუბრა. ბახტაძის ინფორმაციით, ე.წ. შავ სიაში მყოფილი ადამიანების 95 პროცენტს სწორედ 2 000 ლარამდე "ძირი თანხის" მქონე დავალიანება აქვთ.

პირობები, რომელსაც ვალის ჩამოსაწერად პირი უნდა აკმაყოფილებდეს:

  • თითოეულ ფინანსურ კომპანიაში ვალის ძირი თანხის მოცულობა არ უნდა აღემატებოდეს 2 000 ლარს, თუმცა შესაძლოა, ჯამში 2 000 ლარზე გაცილებით მეტი იყოს;
  • მინიმუმ ბოლო ერთი წლის განმავლობაში არ გადახდილა სესხის ნაწილი.

ვალის სანახავად საჭირო ინფორმაცია

"გასანულებელი ვალების" შესახებ ინფორმაციის მოსაძებნად მოქალაქემ პირადი ნომერი და დაბადების თარიღი უნდა შეიყვანოს. საწყის ეტაპზე სისტემა დაინახავს მხოლოდ რამდენიმე საფინანსო კომპანიაში არსებულ დავალიანებას.

საფინანსო კომპანიების ჩამონათვალი:

  • საქართველოს ბანკი;
  • თიბისი ბანკი;
  • ლიბერთი ბანკი;
  • სილქ როუდ ბანკი;
  • ხალიკ ბანკი საქართველო;
  • იშბანკი საქართველო;
  • სხვა კომპანიებთან ბაზები ზუსტდება.

ვებგვერდის გათიშვის დრო

ვებგვერდი რამდენიმე წუთი ჩართული იყო. მასზე გამოქვეყნებული ინფორმაციის მიხედვით, ის 2019 წლის 31 დეკემბრის 18 საათამდე იმუშავებს, შემდეგ კი გაითიშება.

ამავე თემაზე: