Vali.Ge, ვებგვრედი, რომელიც 18 საათზე უნდა ჩართულიყო არ მუშაობს. ამ ეტაპზე ზუსტი დრო ცნობილი არაა. ამის შესახებ On.ge-ს ინფორმაცია ბანკი ქართუს საზოგადოებასთან ურთიერთობის სამსახურში განუცხადეს.

თავდაპირველად, ქართუში On.ge-ს განუცხადეს, რომ ეს საკითხი "ფინანსთა სამინისტროს თემა" იყო, მოგვიანებით კი თავად დარეკეს და თქვეს, რომ დღეს, 10 დეკემბერს საღამოს ჩაირთვებოდა.

Vali.Ge — ეს არის ვებგვერდი, სადაც მოქალაქეებს შეუძლიათ გადაამოწმონ ე.წ. ვალების განულების პროგრამაში მონაწილეობენ თუ არა. მართალია, ვებგვერდი ქართუს სახელზეა რეგისტრირებული და პროექტსაც ის ახორციელებს, თუმცა ინფორმაციას პრემიერი, მამუკა ბახტაძე აჟღერებს.

საბანკო ვალის განულების ინიციატივა

19 ნოემბრის საგანგებო ბრიფინგზე პრემიერმა მამუკა ბახტაძემ ე.წ. შავ სიაში მყოფი 600 ათასი ადამიანისთვის ჯამში 1,5 მილიარდი ლარის ვალის განულებაზე ისაუბრა.

პირობები, რომელსაც ვალის ჩამოსაწერად პირი უნდა აკმაყოფილებდეს:

  • თითოეულ ფინანსურ კომპანიაში ვალის ძირი თანხის მოცულობა არ უნდა აღემატებოდეს 2 000 ლარს, თუმცა შესაძლოა, ჯამში 2 000 ლარზე გაცილებით მეტი იყოს;
  • მინიმუმ ბოლო ერთი წლის განმავლობაში არ გადახდილა სესხის ნაწილი.

ვის არ ჩამოეწერება ვალი:

  • ვივუსის კლიენტებს. ფინანსთა მინისტრის თქმით, ამ კომპანიასთან ვერ შეთანხმდნენ;
  • ვისი ვალის ძირი თანხაც 2 000 ლარს აჭარბებს.

ბახტაძის ინფორმაციით, ე.წ. შავ სიაში მყოფილი ადამიანების 95 პროცენტს სწორედ 2 000 ლარამდე "ძირი თანხის" მქონე დავალიანება აქვთ.

ამავე თემაზე: