სოფელ ფოკაში მომხდარი მკვლელობის ფაქტზე ბრალდებულს აღკვეთის ღონისძიების სახით პატიმრობა შეეფარდა.

პროკურატურის ცნობით, 2018 წლის 3 დეკემბერს, სოფელ ფოკაში შურისძიების მოტივით, განზრახ მოკვლის მიზნით, ბრალდებულმა ცეცხლსასროლი იარაღიდან ახალგაზრდას ესროლა, რომელიც ადგილზე გარდაიცვალა.

4 დეკემბერს ნინოწმინდის მუნიციპალიტეტის სოფელ ფოკაში მოკლული პირის ახლობლებმა და თანასოფლელებმა მკვლელობაში ბრალდებულს სახლი, სათავსო და ავტომობილები დაწვეს. პოლიციამ მკვლელობის ბრალდებით დაკავებული კაცის ოჯახის წევრები უსაფრთხო ადგილზე გადაიყვანა.

შინაგან საქმეთა სამინისტრო უარყოფს რუსთავი 2-ის ინფორმაციას, რომლის მიხედვითაც სოფელ ფოკაში დაძაბული მდგომარეობის გამო სპეცდანიშნულების რაზმი შეიყვანეს.

უწყების ცნობით, შემოსაზღვრულია ტერიტორია, სადაც მკვლელობა მოხდა და სწორედ ამ ადგილს იცავს პოლიცია.

რუსთავი 2-ის ცნობით, მათ გადაიღეს კადრები, სადაც ჩანს, რომ ბრალდებულს პოლიცია მფარველობს. შსს-ს ცნობით, დაკავებული ახალციხის სასამართლოდან საპატიმროში გადაყვანის დროს ავტომობილი სამსახურეობრივ-ტექნიკური მიზეზით შეჩერდა.

"სამცხე-ჯავახეთის პოლიციის დეპარტამენტის გამომძიებელს ხელთ ჰქონდა სამსახურეობრივი დოკუმენტაცია, რომელიც გადასცა დაკავებულის თანმხლებ პოლიციის თანამშრომლებს, რის შემდეგაც ავტომობილმა სვლა შეუფერხებლად განაგრძო", — განმარტავენ უწყებაში.