ათწლეულების შემდეგ სამხრეთ კორეიდან ჩრდილოეთ კორეაში მატარებელი პირველად გაემგზავრა. მატარებელში არიან სამხრეთ კორეელი ექსპერტები, რომლებიც ჩრდილოეთ კორეას სარკინიგზო ხაზის მოდერნიზაციაში დაეხმარებიან, რაცხელს შეუწყობს მიმოსვლასა და ვაჭრობას.

ფხენიანის ლიდერმა სამხრეთ კორეის პრეზიდენტს სარკინიგზო ინფრასტრუქტურის რეაბილიტაციისთვის დახმარება აპრილის ისტორიული შეხვედრისას სთხოვა. ინფრასტრუქტურის დიდი ნაწილი მეოცე საუკუნის პერიოდისაა.

28 ექსპერტი მატარებელში 18 დღის განმავლობაში იცხოვრებენ და 1 200 კილომეტრის სარკინიგზო გზასა და ინფრასტრუქტურას შეისწავლიან. BBC-ს განმარტებით, ინჟინრებს მხოლოდ ხაზის დათვალიერების უფლება აქვთ, ჯერჯერობით მასთან შეხებას ვერ შეძლებენ.

იმის გამო, რომ ჩრდილოეთ კორეას გაერომ სანქციები დაუწესა, ექსპერტებს გაეროსგან სპეციალური ნებართვა დასჭირდათ. ორ კორეას შორის ურთიერთობები ბოლო ერთი წლის განმავლობაში საგრძნობლად გაუმჯობესდა.

ჩრდილოეთ და კორეის ლიდერები პირველად ერთმანეთს 27 აპრილს შეხვდნენ. 1953 წლის შემდეგ, კიმ ჩენ ინი ჩრდილოეთ კორეის პირველი ლიდერია, რომელმაც დემილიტარიზებული საზღვარი გადაკვეთა და სამხრეთ კორეის ტერიტორიაზე პრეზიდენტ მუნ ჯეი ენს შეხვდა.

სამიტის კულმინაცია ორ ლიდერს შორის გაფორმებული მშვიდობის დეკლარაცია იყო, რომლის მიხედვითაც ჩრდილოეთ და სამხრეთ კორეა მიმდინარე წელს ომის დასრულებაზე შეთანხმდა.

ამის შემდეგ მუნ ჯეი ინი ფხენიანში ჩავიდა და გახდა სამხრეთ კორეის პირველი ლიდერი, რომელიც ჩრდილოეთ კორეას ეწვია.