ჩრდილოეთ კორეის დედაქალაქ ფხენიანში კიმ ჩენ ინისა და მუნ ჯეი ინის კიდევ ერთი სამიტი გაიმართა. შეთანხმება ბირთვული განიარაღების შესახებ შეხვედრის მთავარი შედეგია.

დოკუმენტის შინაარსის შესახებ ლიდერებმა საერთო პრესკონფერენციაზე ისაუბრეს. ჩრდილოეთ კორეა მზადაა, იონბენეში თავისი ძირითადი ბირთვული პოლიგონი გაანადგუროს, თუ აშშ ადრე მიღწეულ შეთანხმებას დაიცავს. მათ ასევე, განაცხადეს, რომ საბოლოოდ გაანადგურეს ტონჩხანში სარაკეტო პოლიგონი. ფხენიანი მზადაა, რომ ტონჩხანში უცხოელი დამკვირვებლები შეუშვას, რათა დემონტაჟში დარწმუნდნენ.

იონბენეს ბირთვული პოლიგონის განადგურების შეთანხმებას კიმ ჩენ ინმა და დონალდ ტრამპმა ივნისში საერთო სამიტზე მიაღწიეს.

ჩრდილოეთ კორეა და სამხრეთ კორეა შეთანხმდნენ, რომ საზღვართან, დემილიტარიზებულ ზონაში სამხედრო სწავლებასა შეწყვეტდნენ. იგეგმება, რომ ყვითელ ზღვაში შეიქმნას ბუფერული ზონა, სადაც სამხედრო-საზღვარო წვრთნები არ ჩატარდება.

გარდა ამისა, ორივე კორეა 2018 წლის მსგავსად ოლიმპიადებზე საერთო გუნდით იასპარეზებს. ისინი, ასევე, 2032 წლის ოლიმპიადის ჩატარებისთვის ერთად იბრძოლებენ.

ჩრდილოეთ კორეის ლიდერმა, კიმ ჩენ ინმა განაცხადა, რომ მზადაა სეულს უახლოეს დღეებში ეწვიოს. ეს იქნება ისტორიაში ჩრდილოეთ კორეის ლიდერის პირველი ვიზიტი სამხრეთ კორეის დედაქალაქში. მათ, ასევე თქვეს, რომ სურთ კორეის ნახევარკუნძული ბირთვული იარაღის გარეშე "მშვიდობიან მიწად" აქციონ.

ფოტო: Xinhua / Barcroft Images

სამხრეთ კორეის პრეზიდენტი, მუნ ჯეი ინი ჩრდილოეთ კორეაში 18 სექტემბერს ჩაფრინდა. ბოლო ათწლეულების განმავლობაში ეს პირველი შემთხვევაა, როდესაც სამხრეთ კორეის ლიდერი ფხენიანს ეწვია. აქამდე ისინი ერთმანეთს სამჯერ შეხვდნენ. მათი პირველი შეხვედრა ამ წელს, აპრილის ბოლოს ორივე სახელმწიფოს საზღვარზე ჩატარდა. მაშინ ჩრდილოეთ კორეის ლიდერმა პირველად გადალახა ფეხით საზღვარი და სამხრეთ კორეის პრეზიდენტს მიესალმა.

ამას შემდგომში მოჰყვა კიმ ჩენ ინის შეხვედრა აშშ-ის პრეზიდენტთან, დონალდ ტრამპთან. მათი მოლაპარაკების მთავარი თემა ჩრდილოეთ კორეის ბირთვული განიარაღება იყო.