ენმ დავით ნარმანიას უნდობლობას უცხადებს და ხელმოწერების შეგროვებას იწყებს იმისთვის, რომ თბილისის მერის გადაყენების საკითხი საკრებულოს სხდომაზე დააყენოს. ერთიანი ნაციონალური მოძრაობის პროტესტი ძირითადად ბოტანიკური ბაღის გასხვისების საკითხმა, ყაზბეგის ქუჩაზე გაჩეხილმა ხეებმა და ნარმანიას მერობის პერიოდში თბილისში განხორციელებული არაერთი მათთვის მიუღებელი ქმედებაა გახდა.

გარდა ზემოაღნიშნულისა, ენმ გუშინ თბილისის მერის მიერ სამოქალაქო სექტორის ერთ-ერთი წარმომადგენლის სიტყვიერი შეურაცხყოფის ფაქტსაც გამოეხმაურა.

ენმ-ს წევრი, ირაკლი აბესაძე განმარტავს, რომ არსებული სიტუაციიდან ერთადერთი გამოსავალი ნარმანიას თანამდებობიდან გათავისუფლებაა:

"თბილისელებს უნდა მიეცეთ საშუალება აირჩიონ ქალაქის ახალი მერი. პროცედურულად, რა თქმა უნდა, ამას საკრებულოს უმრავლესობის წევრების მხარდაჭერაც სჭირდება. ამიტომ ჩვენ ამ შეთავაზებას საკრებულოს უმრავლესობის წევრებს გავუგზავნით და გვაინტერესებს, ქართული ოცნების საკრებულოს წევრები სრულად იღებენ თუ არა პასუხისმგებლობას ნარმანიას მიერ შექმნილ პრობლემებზე".

აღნიშნულთან დაკავშირებით, საკრებულოს თავჯდომარემ, გიორგი ალიბეგაშვილმა კი განმარტა, რომ თავისუფალი სიტყვის უფლება ყველას აქვს და განაცხადა, რომ საკითხი პოლიტიზირებულია:

"ჩვენმა თანამოქალაქეებმა აირჩიეს ბატონი დავითი და ბუნებრივია, რომ გადაწყვეტილებას, თავისი ვადის გასვლის შემდეგ, ქალაქის მოსახლეობა მიიღებს".

იმისთვის, რომ ნარმანიას გათავისუფლების საკითხი საკრებულოს სხდომაზე გავიდეს, 24 დეპუტატის მხარდაჭერაა საჭირო. ხოლო, თუ აღნიშნული საკითხი დღის წესრიგში დადგება, იმისთვის, რომ ნარმანიამ თანამდებობა დატოვოს, 34 დეპუტატის მხარდაჭერა გახდება საჭირო.

არასამთავრობო სექტორისა და ოპოზიციის წარმომადგენლების პროტესტი თბილისის მერიისა და დავით ნარმანიას მისამართით მას შემდეგ გაიზარდა, რაც ყაზბეგის 24 ნომერში ასწლოვანი ნაძვები გაჩეხეს.

აღნიშნულის გამო საკრებულოს ოპოზიციამ ნარმანია საკრებულოს სხდომაზე დაიბარა, რომელზე მისვლასაც დედაქალაქის მერი 26 აგვისტოს გეგმავს.

24 აგვისტოს კი, თბილისის მერიაში, გამწვანების რეგულაციების თემაზე გამართულ შეხვედრაზე, თბილისის მერმა მწვანე მუშტის წარმომადგენელს, ირაკლი კუპრაძეს სიტყვიერი შეურაცხყოფა მიაყენა:

"მე თქვენთვის სიტყვა არ მომიცია, ვინ არის ეს. მაიმუნი ვირიშვილი, ულტიმატუმებით შემოვიდა".