საქართველოს ჟურნალისტური ეთიკის ქარტია ტვ პირველის ჟურნალისტზე, თათია ჩაფიჩაძის მიმართ განხორციელებული ძალადობის საქმეზე განცხადებას ავრცელებს და პოლიტიკურ პარტიებს და მათ აქტივისტებს მოუწოდებს, რომ მედიას მუშაობის საშუალება მისცენ.

ქარტიაში იმედოვნებენ, რომ ჩაფიჩაძის შემთხვევა გამონაკლისი იქნება და მსგავსი ინციდენტები აღარ დაფიქსირდება.

"არჩევნების დღეს მედია მნიშვნელოვან როლს ასრულებს. სწორედ ის უზრუნველყოფს აუდიტორიის ინფორმირებას ამ დემოკრატიული პროცესის შესახებ. მისი მოვალეობაა, აჩვენოს ყველა ხარვეზი და კანონდარღვევა, ამიტომაც აუცილებელია, ჟურნალისტებმა შეძლონ მშვიდ ვითარებაში მუშაობა და პროფესიული საქმიანობის შეუფერხებლად განხორციელება", — აცხადებენ ქარტიაში.

შინაგან საქმეთა სამინისტროს განცხადებით, TV პირველის ჟურნალისტზე ძალადობის საქმეზე გამოძიება დაიწყეს. ტელეკომპანიის ინფორმაციით, საარჩევნო უბანთან გადაღებისას მათ ჟურნალისტს, თათია ჩაფიჩაძეს მუშაობაში ხელი შეუშალეს და ხელი დაარტყეს.