ბანკი ქართუ ომეგა ჯგუფის, ზაზა ოქუაშვილის დამფუძნებლის ბრალდებებთან დაკავშირებით განცხადებას ავრცელებს და აღნიშნავს, რომ წინა ხელისუფლებისგან დარბევის ეს კომპანია მათი მსესხებელია. ასე ბანკმა იმ ბრალდებას უპასუხა, რომლის მიხედვითაც, ხელისუფლების მიმართ პოზიტიური განწყობის შესაქმნელად ქართუმ ომეგა ჯგუფისთვის 8 მილიონიანი სესხი გამოყო.

ბანკში ამბობენ, რომ კომპანია სესხს გრაფიკის მიხედვით იხდიდა და მას არსებული ლიმიტის გათვალისწინებით გამოყეს თანხა.

"საზოგადოებამ უნდა იცოდეს რომ ომეგა ჯგუფის მენეჯერებმა თანხის მოთხოვნით ქართუს რამდენიმე თვის წინ მიმართეს და ბანკისგან მიიღეს გარანტია, რომ ინკასოს მოხსნის შემთხვევაში, თანხას მისცემდნენ, ვინაიდან ბანკი პირველ რიგში დაინტერესებულია კლიენტი იყოს გადამხდელუნარიანი და არ მოუწიოს უზრუნველყოფაში არსებული აქტივების რეალიზაცია", — აღნიშნულია ბანკის მიერ გავრცელებულ განცხადებაში და განმარტებულია, რომ ოქუაშვილის თანხმობის შემთხვევაში შესაბამის დოკუმენტებსაც გაასაჯაროებენ.

ომეგა ჯგუფის დამფუძნებელი, ზაზა ოქუაშვილი ამტკიცებს, რომ ბრალდებების უარსაყოფად ხელისუფლება გარიგებას სთავაზობდა. მისივე თქმით, ტელეკომპანია იმედისთვის, დადგმული ინტერვიუ უნდა მიეცა, რომელშიც უნდა ეთქვა, რომ ქართული ოცნების თავმჯდომარის, ბიძინა ივანიშვილის მხრიდან ფულის გამოძალვაზე ინფორმაცია ტყუილი იყო.