რუსეთის მიერ ყირიმის ანექსიიდან ორი წლის შემდეგ, 2 მილიონი ადამიანი, კვლავ უშედეგოდ ელოდება დაპირებულ "უკეთეს ცხოვრებას". ადგილობრივები ამბობენ, რომ ფასები უაზროდ გაიზარდა, ხოლო შემოსავლები და პენსიები მუდმივ სტაგნაციაშია და აღარც ტურისტები ჩადიან.

ყირიმი მსოფლიოს ყურადღების ქვეშ, კიდევ ერთხელ, მას შემდეგ მოექცა, რაც რუსეთის პრეზიდენტმა, ვლადიმერ პუტინმა, უკრაინა ყირიმის საზღვრებთან აგენტების გაგზავნასა და ინდუსტრიის განვითარების შეფერხებაში დაადანაშაულა. ადგილობრივები ამ ბრალდებას არ იზიარებენ და ამბობენ, რომ ის ზარალი რაც მათ ნახეს, რუსეთის ხელისუფლების გულგრილობის დამსახურებაა.

„ჩვენ შევუერთდით რუსეთს, მათ კი ჩვენი არსებობის შესახებ საერთოდ დაავიწყდათ“, ამბობს ევგენი, ტიტანიუმის საწარმოს მუშა, არმიანსკიდან.

„ხალხი გულუბრყვილოა, ისინი ფიქრობდნენ, რომ რუსეთთან შეერთების შემდეგ ყველაფერი რუსული იქნებოდა. სინამდვილეში მხოლოდ ფასები გახდა რუსული, შემოსავალი კი იგივე დარჩა. აი, ეს არის მთავარი პრობლემა.“

სამსახურიდან გათავისუფლების შიშის გამო, ევგენიმ საკუთარი გვარის გამხელისგან თავი შეიკავა. ასე მოიქცნენ სხვა მუშებიც, ვინც ინტერვიუს მიცემაზე დათანხმდა.

არმიანსკი ყირიმის მიძინებული ქალაქია, რომელიც უკრაინის ახლად დადგენილ საზღვართან იმყოფება. დასახლება სწორედ იმ ტერიტორიას მიეკუთვნება, სადაც რუსეთის განცხადებით, გასულ კვირას შეიარაღებული ძალები დაუპირისპირდნენ უკრაინელ აგენტებს. ოფიციალური კიევი ამ შემთხვევას უარყოფს და აცხადებს, რომ რუსეთმა ინციდენტის ფაბრიკაცია მოახდინა, რათა მომავალში კვლავ აწარმოონ სამხედრო მოქმედებები უკრაინის წინააღმდეგ.

ქიმიური საწარმოები

არმიანსკი არასდროს ყოფილა აყვავებული ქალაქი. აქ მცხოვრებთა ¼ , ანუ 20 ათასი ადამიანი ყირიმის ტიტანიუმის საწარმოშია დასაქმებული, რომლებიც ყოველდღე ავტობუსით გადაადგილდებიან ქალაქიდან საწარმოში და საწარმოდან ქალაქში.

როდესაც ყირიმი უკრაინის კონტროლის ქვეშ იმყოფებოდა, საქონელი და სერვისები ხელმისაწვდომი იყო და საწარმოს მუშებს თავისუფლად შეეძლოთ საკუთარ თავზე ზრუნვა, თუმცა მას შემდეგ რაც, გასულ წელს კიევმა სატვირთო მომარაგება დაბლოკა, ფასებმა მოიმატა.

„ჩვენ მხოლოდ საკვების ყიდვა შეგვიძლია, ძალიან გვიჭირს ტანსაცმლის შეძენა“, ამბობს პაველი, ტექნიკოსი, რომელიც ამბობს, რომ მისი თვიური შემოსავალი 17 ათასი (263$) რუბლია. ეს რიცხვი რუსეთის საშუალო შემოსავლის ნახევარზე ნაკლებია.

„ასეთი შემოსავალი უკრაინაში საკმარისი იქნებოდა, რადგან ფასები დაბალი იყო. შოკში ვარ. ჩემი შემოსავალი იგივე დარჩა, ფასები კი იზრდება“

სამმა მუშამ Reuters-თან საუბრისას განაცხადა, რომ ხელფასები საწარმოში, პოზიციიდან გამომდინარე, 10 ათასი რუბლიდან 21 ათას რუბლამდე მერყეობს. ლაბორატორიულ ასისტენტებს ყველაზე დაბალი, ხოლო ინჟინრებს ყველაზე მაღალი ხელფასი აქვთ.

ტიტანიუმის საწარმო უკრაინელი ბიზნესმენის, დმიტრო ფირტაშის კუთვნილებაა. მისმა წარმომადგენელმა და საწარმოს მენეჯერებმა უარი განაცხადეს კომენტარის გაკეთებაზე.

რუსეთი აშენებს ხიდს, რათა ყირიმი დაუკავშიროს რუსეთის სამხრეთის ნაწილს. ამ გზით ისინი იმედოვნებენ, რომ მიმოსვლა ერთმანეთს შორის გამარტივდება და ფასებიც დაიკლებს. უნდა აღინიშნოს, რომ პირველი მარშრუტის შესრულება 2018 წლამდე წარმოუდგენელია.

უფულობა

მოსკოვმა არმიანსკის პრობლემების შესახებ ყველაფერი იცის. ოფიციალურმა მოსკოვმა ის იმ 300 ქალაქის სიაში შეიტანა, რომელსაც ინვესტიციების მოზიდვაში სახელმწიფოს დახმარება სჭირდება, რათა მოხდეს ამ ქალაქების ეკონომიკის დივერსიფიცირება. როდესაც Reuters-ის ჟურნალისტი ყირიმის ეკონომიკის მინისტრს დაუკავშირდა, მან განაცხადა, რომ ამ დროისთვის არც ერთი პროექტის განხორციელება არ დაწყებულა რეგიონში.

რუსეთმა დააანონსა, რომ ყირიმის განვითარებისთვის, 2020 წლამდე, $10 მილიარდის (680 მილიარდი რუბლი) ინვესტირებას აპირებს. ეს არის ის ციფრი, რომელსაც რუსეთის ხელისუფლება ყოველთვიურად ხარჯავს პენსიების, მასწავლებლების, ექიმებისა და საჯარო მოხელეების ხელფასებში.

პენსიონერები, საჯარო მოხელეები და ტურიზმის სფეროში დასაქმებული ადამიანები ანექსიის შემდეგ დიდ ფინანსურ ზრდას ელოდნენ, თუმცა რუბლის ფასის დოლართან მიმართებაში განახევრებამ, დასავლურმა სანქციებმა და ნავთობის დაბალმა ფასმა იმედები გაუცრუათ.

მაისში, რუსეთის პრემიერ-მინისტრი დიმიტრი მედვედევი ყირიმს ეწვია და მოსახლეობას შეხვდა. მედვედევი პენსიონერი ქალბატონის კრიტიკამ ძლიერ შეაწუხა. მოხუცი ქალბატონი ჩიოდა, რომ ყირიმში მცხოვრებ ნახევარ მილიონ პენსიონერს საარსებო მინიმუმიც კი არ გააჩნია.

„ყირიმში შეუძლებელია პენსიით ცხოვრება. ფასები გიჟურია. რა ჯანდაბაა 8 ათასი რუბლი?“ - ამბობდა ქალბატონი.

მის წუხილს მედვედევმა შემდეგი პასუხი გასცა: „სამწუხაროდ ჩვენ არ გვაქვს ფული… გამხნევდით“.

ცარიელი რესტორნები

ისტორიულად, ყირიმი, რუსეთის იმპერიის პერიოდიდან მოყოლებული, ტურისტებისთვის მიმზიდველი ნახევარკუნძული იყო. პუტინმა გასულ წელს თქვა, რომ ტურისტული სეზონი ყირიმისთვის მომგებიანი იქნებოდა, თითქოს მოსკოვი შეიმუშავებდა გეგმას ტურისტების მოსაზიდად, მაგრამ ანექსიამ თავისი კვალი დატოვა. უკრაინელი დამსვენებლები, რომლებიც, როგორც წესი, მატარებლით ჩადიოდნენ ყირიმში, ცხადია, აღარ გამოჩენილან. ისინი არც რუსს დამსვენებლებს ჩაუნაცვლებიათ.

როდესად ყირიმი უკრაინის მიერ იყო კონტროლირებული, ნახევარკუნძულს ყოველწლიურად 6 მილიონ ტურისტზე მეტი სტუმრობდა. ანექსიის შემდეგ, ტურისტების რაოდენობამ მკვეთრად დაიკლო და მათი რიცხვი ამ ეტაპისთვის არ გაზრდილა.

„როდესაც უკრაინას ვეკუთვნოდით, ბევრად მეტი ხალხი ჩამოდიოდა. ქუჩები ისეთი სავსე იყო, გზას ძლივს გაიკვალავდი“, აცხადებს რესტორანი „ევროპის“ ხელმძღვანელი იევპატორიაში.