გაერთიანებული ოპოზიციის ერთ-ერთი ლიდერის, გიორგი ვაშაძის თქმით, იმისთვის, რომ საბანკო ვალების განულებაზე პრემიერის დაპირება შესრულდეს, ძალა ერთობაშიას საპრეზიდენტო კანდიდატმა, გრიგოლ ვაშაძემ უნდა გაიმარჯვოს. ვაშაძის თქმით, ოპოზიციას მსგავსი ინიციატივა და ამ მიმართულებით კონკრეტული გეგმა დიდი ხანია აქვს.

"ჯერ კიდევ არ გვაქვს გამარჯვება საბოლოოდ მოპოვებული არჩევნებში და რამხელა ნაბიჯებზე უწევს ოცნებას წასვლა. თუ გვინდა, რომ, რაც დღეს იყო ნათქვამი, მართლა შესრულდეს, ამისთვის აუცილებელია გრიგოლ ვაშაძემ გაიმარჯვოს... კარგია, რომ აღარ გვესმის ივანიშვილის მხრიდან, რომ ყველამ უნდა ავიყვანოთ პირადი ბანკირი და ცოტა ფიქრი დაიწყეს იმ პრობლემებზე, რომლებიც არსებობს", — აღნიშნა ვაშაძემ.

არჩევნების მეორე ტურამდე რამდენიმე დღით ადრე მთავრობა "შავ სიაში" მყოფ 600 000 ადამიანს ჯამში 1,5 მილიარდის ოდენობის დავალიანებას უნულებს. ცვლილება ბანკების, ონლაინ ორგანიზაციებისა და სხვა საფინანსო ინსტიტუტების მიმართ დავალიანებას შეეხება.

გუშინ, 18 ნოემბერს თბილისის მერმა კახა კალაძემ ქართული ოცნების შტაბში, ჭარბვალიანობის თემაზე გამართულ საგანგებო ბრიფინგზე პრეზიდენტობის კანდიდატს, გრიგოლ ვაშაძეს უპასუხა. კალაძემ საქართველოს მთავრობის "მასშტაბურ გადაწყვეტილება" დააანონსა და პრეზიდენტობის კანდიდატის გამოსვლას "შავი სიიდან" მოქალაქეების ამოღებაზე კლოუნადა უწოდა.

საქართველოში საპრეზიდენტო არჩევნების მეორე ტური მიმდინარე წლის 28 ნოემბერს ჩაინიშნა. იმის მიუხედავად, რომ მთავრობა მის მიერ მხარდაჭერილი კანდიდატის, სალომე ზურაბიშვილის დამაჯერებელ გამარჯვებაზე საუბრობდა, არჩევნების მეორე ტურის ჩატარება აუცილებელი გახდა. ამის შემდეგ უმრავლესობამ და მთავრობამ დაშვებულ შეცდომებზე დაიწყო საუბარი, პარტიის თავმჯდომარემ კი "შეცდომების გამოსასწორებლად" მოქალაქეებისგან ერთწლიანი ვადა ითხოვა.