ხორავას ქუჩის საქმეზე დანაშაულის შეუტყობინებლობისთვის ბრალდებული მირზა სუბელიანის სასამართლო სხდომა, მისი ჯანმრთელობის მდგომარეობის გაუარესების გამო გადაიდო. სხდომა 4 დეკემბერს, 14 საათზე გაიმართება.

როგორც ადგილიდან On.ge-ს ჟურნალისტის იუწყება, სუბელიანის მდგომარეობის შესახებ დაცვის მხარისთვისაც დღეს გახდა ცნობილი. განცხადებაში, რომელიც მოსამართლემ სხდომაზე წაიკითხა, ნათქვამია, რომ ბრალდებულს სურს პროცესზე დასწრება და ითხოვს მის გარეშე არ განიხილებოდეს საქმე.

ადვოკატის განმარტებით, სუბელიანი ჩართულია სუიციდის პრევენციის პროგრამაში, მკურნალობის კურსს გადის. მისივე თქმით, სამედიცინო დასკვნაში აღნიშნულია, რომ ჯანმრთელობის მდგომარეობის გაუარესების გამო ბრალდებულის ბადრაგირება შეუძლებელია კონკრეტული მიზეზი კი მითითებული არაა.

დღეს, 15 ნოემბერს სასამართლო პროცესზე დაცვის მხარეს შესავალი სიტყვა უნდა ეთქვა.

მირზა სუბელიანი 9 ივნისს დანაშაულის შეუტყობინებლობის ბრალდებით დააკავეს. წარდგენილი ბრალის თანახმად, პირველ დეკემბერს თბილისში, ხორავას ქუჩა #4-ის მიმდებარე ტერიტორიაზე ორი არასრულწლოვნის მკვლელობის შემდეგ მან გაიგო ერთ-ერთი არასრულწლოვნის, გ.ჯ.-ს დანაშაულის შესახებ და არ შეატყობინა სამართალდამცავ ორგანოებს. ადვოკატის თქმით, სუბელიანი ბრალს აღიარებს. სასამართლომ აღკვეთის ღონისძიებად მას პატიმრობა შეუფარდა.