ხორავას ქუჩის საქმეზე მოკლულის მამა, ზაზა სარალიძე ვაკე-საბურთალოს პოლიციის განყოფილებაში გამოკითხვაზეა დაბარებული. ამის შესახებ ჟურნალისტებს თავად ზაზა სარალიძემ განუცხადა. On.ge-ს შინაგან საქმეთა სამინისტროში განუმარტეს, რომ გამოკითხვაზე დაბარება ზაზა სარალიძის მიმართ შესაძლო მუქარას უკავშირდება.

"ნებისმიერ კითხვაზე მზად ვარ, პასუხი გავცე და ვითანამშრომლო გამოძიებასთან, მიუხედავად იმისა, რომ არ ვენდობი ამათ გამოძიებას", — განაცხადა ზაზა სარალიძემ.

ზაზა სარალიძის განცხადებით, ბოლო პერიოდის განმავლობაში ის ფეისბუქში მუქარის შემცველ შეტყობინებებს იღებს. გამოძიება ვაკე-საბურთალოს სამმართველოში, სისხლის სამართლის კოდექსის 151-ე მუხლით დაიწყო, რაც მუქარას გულისხმობს.