"ჩვენ ვართ რეფორმატორი მთავრობა", — ამის შესახებ საქართველოს ფინანსთა მინისტრმა, მიხეილ მაჭავარიანმა პარლამენტში 2019 წლის ბიუჯეტის პროექტის წარდგენისას განაცხადა.

ივანე მაჭავარიანის თქმით, ბიზნეს გარემოს გაუმჯობესების მიზნით განხორციელებული რეფორმები აისახა საერთაშორისო რეიტინგებში. მინისტრის თქმით, ბიზნესის კეთების რეიტინგში საქართველომ პოზიცია გაიუმჯობესა და მე-6 ადგილზე გადაინაცვლა.

"საქართველო არის ევროპაში მე-2 ადგილზე დანიის შემდეგ. მე-6 ადგილი ეს არის ელიტარული ადგილი, რომელიც საერთაშორისო ინვესტორების მსოფლიო რუკაზე საქართველოს ერთ-ერთ მნიშვნელოვან ინტერესის ცენტრად აქცევს", — განაცხადა ფინანსთა მინისტრმა, ივანე მაჭავარიანმა.

როგორც მან აღნიშნა, საქართველოს აქვს მნიშვნელოვანი გაუმჯობესება მსოფლიო ბანკის მმართველობის ინდიკატორებში და ყველა მაჩვენებლით რეგიონში ლიდერია.

"მთავრობის ეფექტიანობის რეიტინგში ვუსწრებთ არა მხოლოდ ჩვენი რეგიონის ყველა ქვეყანას, არამედ ევროპის ზოგიერთ ქვეყანასაც (სერბეთი, რუმინეთი ბულგარეთი, მონტენეგრო) კორუფციის კონტროლის რეიტინგში ვუსწრებთ ევროპის ისეთ ქვეყნებს, როგორიცაა: პოლონეთი, ლიტვა, ლატვია, ხორვატია, რუმინეთი. რეგულირების ხარისხის რეიტინგში 39-ე ადგილზე ვართ და ვუსწრებთ ისეთ ქვეყნებს როგორიცაა: პოლონეთი, ბულგარეთი, სლოვენია, რუმინეთი, ხორვატია", — განაცხადა მინისტრმა.

მისი თქმით, საქართველო გადასახადების სიმცირის მიხედვით მსოფლიოში მე-3 ადგილზეა.

" თუ არ ჩავთვლით ამ მცირე სახელმწიფოებს შეგვიძლია ვთქვათ, რომ საქართველო არის მსოფლიოში პირველ ადგილზე. ბუნებრივია ყველას გვესმის, რომ ყველა ამ მიმართულებით შედეგები თავისით არ მოსულა",— განაცხადა ფინანსთა მინისტრმა.

საქართველოს პარლამენტის პლენარულ სხდომაზე 2019 წლის სახელმწიფო ბიუჯეტის პროექტს განიხილავენ. ქვეყნის მთავარი ფინანსური დოკუმენტის განხილვა 12:00-ზე უნდა დაწყებულიყო, თუმცა კვორუმის არარსებობის გამო 4 საათით დაიგვიანა.