ფულის გამოძალვისა და ძალადობის ბრალდებით სამართალდამცველებმა წარსულში რამდენჯერმე ნასამართლევი პირი დააკავეს. შინაგან საქმეთა სამინისტროს ცნობით, ბრალდება 6-დან 9 წლამდე თავისუფლების აღკვეთას ითვალისწინებს.

უწყების ინფორმაციით, 1988 წელს დაბადებული პირი მიმდინარე წლის 10 სექტემბერს ერთ-ერთ მოქალაქეს, 1983 წელს დაბადებულ პირს შეხვდა. ბრალდებულმა ამ პირს ყოფილი ბიზნესპარტნიორისთვის ვალის დაბრუნების მოტივით, თვითნებურად განსაზღვრული თანხის — 70 000 ლარის გადახდა მოსთხოვა. ფულის გადაუხდელობის შემთხვევაში კი მისი და მისი ოჯახის წევრების ჯანმრთელობისთვის საშიში ძალადობის გამოყენებით დაემუქრა.

"აღნიშნული შეხვედრიდან ერთი თვის შემდეგ, 11 ოქტომბერს, კვლავ შეხვდა დაზარალებულს, რა დროსაც, თანხის გადაუხდელობის გამო, ფიზიკური შეურაცხყოფა მიაყენა და სიცოცხლის მოსპობით დაემუქრა", — ვკითხულობთ განცხადებაში.

სამართალდამცველებმა ბრალდებული თბილისის ზღვის უბნის დასახლებაში დააკავეს. გამოძიება ორჯერ ან მეტჯერ ნასამართლევი პირის მიერ დიდი ოდენობით ქონების მიღების მიზნით გამოძალვისა და ძალადობის მუხლებით მიმდინარეობს.