Netflix-მა ოფიციალურად დაადასტურა პლატფორმის ყველა დროის ყველაზე ნანახი ფილმის, KPop Demon Hunters-ის გაგრძელების გადაღება. ანიმაცია, რომელიც გასულ ზაფხულს გამოვიდა და კულტურულ ფენომენად იქცა, K-pop ჯგუფის წევრების შესახებ მოგვითხრობს, რომლებიც საიდუმლოდ დემონებზე ნადირობენ.

რეჟისორმა მეგი კანგმა პროექტის მნიშვნელობაზე ისაუბრა: "როგორც კორეელი კინორეჟისორი, უდიდეს სიამაყეს ვგრძნობ იმის გამო, რომ მაყურებელს სურს მეტი იხილოს ამ კორეული ისტორიისა და ჩვენი კორეელი პერსონაჟების შესახებ. ეს მხოლოდ დასაწყისია".

ფოტო: Netflix

ფილმმა უკვე მოიპოვა გრემი და ოქროს გლობუსი, ამჟამად კი ოსკარის ორ ნომინაციაში იბრძვის. პროექტის წარმატებას ნახევარ წელიწადში დაგროვილი 480 მილიონი ნახვა და Billboard Hot 100-ის ლიდერი სიმღერა Golden ადასტურებს.

მომღერალმა Ejae-მ, რომელიც ერთ-ერთი მთავარი გმირის ხმად გვევლინება, სიქველის პერსპექტივაზე თქვა: "იმედია, შევძლებთ კორეის მეტი მხარე ვაჩვენოთ; კორეაში მრავალი სხვადასხვა სახის მუსიკაა, ამიტომ პირადად ამის იმედი მაქვს".

გამოსვლის თარიღი ჯერჯერობით უცნობია, თუმცა ცნობილია, რომ ეს გაგრძელება რეჟისორების, მეგი კანგისა და კრის აპელჰანსის Netflix-თან გაფორმებული ახალი, ექსკლუზიური კონტრაქტის პირველი პროექტი იქნება.

ასევე ნახეთ: KPop Demon Hunters სათამაშოების ხაზი გამოსაშვებად მზადაა