გლდანის მე-8 სასჯელაღსრულების დაწესებულებაში, ფარული აუდიოჩანაწერების საქმეზე, მოწმის სახით მირზა სუბელიანის გამოკითხვა ცოტა ხნის წინ დასრულდა. პროკურორმა ზვიად გუბელაძემ 4-საათიანი გამოკითხვის დასრულების შემდეგ თქვა, რომ მათ სუბელიანთან ათეულობით შეკითხვა ჰქონდათ, ნაწილზე მიიღეს პასუხი, თუმცა ნაწილ კითხვებზე მან პასუხის გაცემისგან თავი შეიკავა. პროკურორის განცხადებით, მირზა სუბელიანი ისევ გამოიკითხება.

პროკურორმა ჩვენების შინაარსზე ჟურნალისტებთან არ ისაუბრა. მან აღნიშნა, რომ მირზა სუბელიანი დღესაც მძიმე ფსიქოლოგიურ მდგომარეობაშია.

მირზა სუბელიანის გამოკითხვას არ ესწრებოდნენ ის ადვოკატები, რომლებიც მას აქამდე იცავდნენ. სასჯელაღსრულების დაწესებულებაში დაგვიანებით მისულ ადვოკატებს ციხეში შესვლის უფლება საშვის არქონის გამო არ მისცეს.

პროკურორმა, ზვიად გუბელაძემ ჟურნალისტებთან აღნიშნა, რომ გამოკითხვას მესამე ადვოკატი ესწრებოდა.

"მირზა სუბელიანის ჩანაწერები"

პროკურატურისა და რუსთავი 2-ის მიერ გავრცელებული "მირზა სუბელიანის აუდიოჩანაწერები", საგამოძიებო უწყების პოზიციით სხვადასხვა დროსაა ჩაწერილი. რუსთავი 2-მა 11 ოქტომბრის, ხოლო პროკურატურამ 6 ივლისის ჩანაწერი გაასაჯაროვა. ამის მიუხედავად, აუდიოჩანაწერებში თემების ნაწილი მეორდება და ერთმანეთს უპირისპირდება კიდეც.

რუსთავი 2-ის ჩანაწერით, სუბელიანს კომპრომატები აქვს ხელისუფლების მაღალჩინოსნების წინააღმდეგ, ხოლო პროკურატურის მიერ გავრცელებული აუდიოჩანაწერით, მირზა სუბელიანი აპირებს მოიტყუოს. აუდიოჩანაწერის ავთენტურობა ჯერჯერობით დადასტურებული არ არის.

პროკურატურაში ამბობენ, რომ ფარულ აუდიოჩანაწერებზე გამოძიება 12 ოქტომბერს დაიწყო, თუმცა საგამოძიებო მოქმედებების შესახებ 14 ოქტომბერს, რუსთავი 2-ის მიერ ჩანაწერის გავრცელების შემდეგ გაავრცელა ინფორმაცია. პროკურატურის ცნობით, სასჯელაღსრულებით დაწესებულებაში კანონდარღვევით სულ სამი ჩანაწერი განხორციელდა.

აუდიოჩანაწერების მოსმენის შემდეგ მმართველი პარტია დადგმულ სერიალზე საუბრობდა, ოპოზიცია კი სისტემურ დანაშაულზე. სასჯელაღსრულების სამსახურში დაადასტურეს, რომ 15 ოქტომბერს მირზა სუბელიანმა თვითმკვლელობა სცადა.