ევროკავშირის ახალდანიშნული ელჩი, კარლ ჰარცელი ფიქრობს, რომ საქართველოს პრეზიდენტობის კანდიდატები თავიანთ საარჩევნო პროგრამებზე არ კონცენტრირდებიან. ელჩმა წინასაარჩევნო გარემო საქართველოში, რუსთავი 2-ის კითხვის პასუხად შეაფასა. კარლ ჰარცელმა მედიასთან გაცნობითი შეხვედრა დღეს, 18 ოქტომბერს გამართა.

"[კანდიდატების მხრიდან] არ არის საუბარი საკონსტიტუციო ძალაუფლებაზე, რომელიც საკმაოდ შეკვეცილია. ამავე დროს პრეზიდენტს ექნება უზარმაზარი შესაძლებლობები, რათა იმოქმედოს ქვეყნის შიგნით, როგორც გამაერთიანებელი და საერთაშორისო სცენაზეც".

ევროკავშირის ელჩის თქმით, პრეზიდენტის ოფისი ძალიან მნიშვნელოვანი და სასარგებლო იქნება ბევრი კუთხით, თუმცა, რეალურად, რას ნიშნავს ეს ოფისი, ამაზე თითქმის არცერთი კანდიდატი არ საუბრობს:

"ეს არის უცნაური ჩემთვის, ანუ ისინი არ საუბრობენ, არ განიხილავენ მათ თავიანთ მომავალ სამსახურს, მომავალ უფლებამოსილებებს. მე რამდენიმე კანდიდატს შევხვდი, მქონდა დისკუსიები, სხვადასხვა შეხედულებები აქვთ მათ, მაგრამ მაინც და მაინც არ აჟღერებენ ამ შეხედულებებს, წინასაარჩევნო კამპანიის დროს".

კარლ ჰარცელი ბოლო დროს გავრცელებულ ფარულ ჩანაწერებსაც შეეხო და აღნიშნა, რომ საჭიროა, გაჟღერებული ბრალდებების საფუძვლიანი გამოძიება. მისივე შეფასებით, ეს ყველაფერი დიდ ზეგავლენას მოახდენს მოქალაქეების ნდობაზე:

"იმას კი არ დაიწყებენ, ვინ არის მართალი და ვინ — არა, ეს ნარევი, ზოგადად, პოლიტიკის მიმართ ადამიანების ნდობას გამოუთხრის ძირს. ეს არის პრობლემა. ამაზე უნდა დავფიქრდეთ, როგორ უნდა მოვუაროთ ამ საკითხს".

კარლ ჰარცელი საქართველოში ევროკავშირის ელჩის თანამდებობაზე 2018 წლის სექტემბერში დაინიშნა. მან მისი წინამორბედი, იანუშ ჰერმანი ჩაანაცვლა.