ხორავას ქუჩის საქმეზე შექმნილი საგამოძიებო კომისიის მიერ მირზა სუბელიანი გამოკითხვის წინა დღეს ციხეში მასთან დეპუტატმა ვიქტორ ჯაფარიძე შევიდა. სწორედ სუბელიანი და ჯაფარიძე ფიგურირებენ რუსთავი 2-სა და პროკურატურის მიერ გავრცელებულ აუდიოჩანაწერებში, სადაც განხილულ საკითხებს შორის ხორავას ქუჩაზე მომხდარი მკვლელობის საქმეც იყო.

მირზა სუბელიანთან შესახვედრად საგამოძიებო კომისიამ ნებართვის მისაღებად წერილი 17 ივლისს გააგზავნა. პარლამენტის თავმჯდომარემ ამავე დღის ბრძანებით შესვლაზე ნებართვა 22 ივლისისთვის გასცა. პარლამენტის დეპუტატმა, ვიქტორ ჯაფარიძემ იმავე პატიმართან შესახვედრად წერილი 19 ივლისს გააგზავნა, 20 ივლისის ბრძანებით კი მომდევნო დღეს შესვლის უფლება მიიღო.

On.ge-ს ამ საკითხზე დეპუტატისგან კომენტარის მიღება სურდა, თუმცა ჯერ თქვა რომ არ ეცალა, მოგვიანებით კი ტელეფონი გამორთო. საგამოძიებო კომისიის თავმჯდომარე, სერგი კაპანაძე On.ge-სთან საუბრისას ამბობს, რომ მირზა სუბელიანს ვიქტორ ჯაფარიძის ვიზიტების შესახებ არაფერი უთქვამს.

დეპუტატმა მირზა სუბელიანთან 5-6-ჯერ შესვლის შესახებ რუსთავი 2-სთვის მიცემულ კომენტარში ისაუბრა.

ეს პირველი შემთხვევა არაა, როცა ვიქტორ ჯაფარიძის მირზა სუბელიანთან შეხვედრა დროში ემთხვევა მნიშვნელოვან მოვლენებს. დეპუტატი პატიმარს 14 ოქტომბერს, კვირა დღესაც შეხვდა. ეს ის დღეა, როცა რუსთავი 2-მა ჯაფარიძე-სუბელიანის ეთერში გასვლა დააანონსა.

"მირზა სუბელიანის ჩანაწერები"

პროკურატურისა და რუსთავი 2-ის მიერ გავრცელებული "მირზა სუბელიანის აუდიოჩანაწერები", საგამოძიებო უწყების პოზიციით სხვადასხვა დროსაა ჩაწერილი. რუსთავი 2-მა 11 ოქტომბრის, ხოლო პროკურატურამ 6 ივლისის ჩანაწერი გაასაჯაროვა. ამის მიუხედავად, აუდიოჩანაწერებში თემების ნაწილი მეორდება და ერთმანეთს უპირისპირდება კიდეც.

რუსთავი 2-ის ჩანაწერით, სუბელიანს კომპრომატები აქვს ხელისუფლების მაღალჩინოსნების წინააღმდეგ, ხოლო პროკურატურის მიერ გავრცელებული აუდიოჩანაწერით, მირზა სუბელიანი აპირებს მოიტყუოს. აუდიოჩანაწერის ავთენტურობა ჯერჯერობით დადასტურებული არ არის.

პროკურატურაში ამბობენ, რომ ფარულ აუდიოჩანაწერებზე გამოძიება 12 ოქტომბერს დაიწყო, თუმცა საგამოძიებო მოქმედებების შესახებ 14 ოქტომბერს, რუსთავი 2-ის მიერ ჩანაწერის გავრცელების შემდეგ გაავრცელა ინფორმაცია. პროკურატურის ცნობით, სასჯელაღსრულებით დაწესებულებაში კანონდარღვევით სულ სამი ჩანაწერი განხორციელდა.

აუდიოჩანაწერების მოსმენის შემდეგ მმართველი პარტია დადგმულ სერიალზე საუბრობდა, ოპოზიცია კი სისტემურ დანაშაულზე. სასჯელაღსრულების სამსახურში დაადასტურეს, რომ 15 ოქტომბერს მირზა სუბელიანმა თვითმკვლელობა სცადა.