საქართველოს პარლამენტის იურიდიულ საკითხთა კომიტეტში შინაგან საქმეთა მინისტრის მოადგილეს, ნათია მეზვრიშვილს სამი საკითხი უნდა წარედგინა, მათ შორის იყო მარიხუანის მოხმარების რეგულირების კანონპროექტიც. იურიდიულ საკითხთა კომიტეტის სხდომაზე გაირკვა, რომ ნათია მეზვრიშვილი პარლამენტში ვერ მივიდოდა და შესაბამისად, დღის წესრიგით გათვალისწინებული საკითხების განხილვაც შემდეგ სხდომაზე გადაიდო.

On.ge-ს შსს-ში განუმარტეს, რომ ნათია მეზვრიშვილს შეხვედრები ჩაენიშნა, რის გამოც პარლამენტში მისვლა ვერ შეძლო. პრესსამსახურის ინფორმაციით, შეხვედრები სავარაუდოდ დახურულია, რადგან წინასწარ დაანონსებული არ ყოფილა.

შს მინისტრის მოადგილის მიმართ მედიის ინტერესი რუსთავი 2-ის მიერ "მირზა სუბელიანის ფარული ჩანაწერის" გავრცელების შემდეგ უფრო გაიზარდა. ამ ჩანაწერების მიხედვით, მიზრა სუბელიანი შსს-ს გაურიგდა. ამ ბრალდებებზე უწყების წარმომადგენლებს ამ დრომდე არ უპასუხიათ.

რუსთავი 2-ის ინფორმაციით, ქართული ოცნების წარმომადგენლებთან ციხეში გამართული შეხვედრის მიზეზი, საკუთარი მდგომარეობით უკმაყოფილო მირზა სუბელიანია, რომელიც სთხოვს დეპუტატ ვიქტორ ჯაფარიძეს, შინაგან საქმეთა მინისტრთან, გიორგი გახარიასთან შეხვედრას და თან აბარებს, რა უნდა უთხრას დეპუტატმა გახარიას.

გავრცელებული ჩანაწერის მიხედვით, საუბრისას არაერთხელ ახსენებენ კიდევ ერთ პიროვნებას შინაგან საქმეთა მინისტრის მოადგილეს, ლევან კაკავას. P.S.-ის წამყვანის თქმით, ჩანაწერიდან ჩანს, რომ სწორედ კაკავას დაავალა გიორგი გახარიამ სუბელიანის საქმის ფინანსური მხარის მოგვარება.

გაიგე მეტი: