ევროპული საქართველოს დეპუტატის, ირაკლი აბესაძის განცხადებით, ძალიან ცხადი და ნათელი ხდება, რომ სახელმწიფო სტრუქტურების ნაცვლად ქვეყანას მართავს ორგანიზებული დანაშაულებრივი სტრუქტურა. ასე გამოეხმაურა დეპუტატი რუსთავი 2-ის მიერ გავრცელებულ ფარულ ჩანაწერს, სადაც სავარაუდოდ, მირზა სუბელიანი ხელისუფლებასთან გარიგებასა და კონკრეტული საქმეების "მოგვარებაზე" საუბრობს.

ირაკლი აბესაძის თქმით, "ორგანიზებული დანაშაულებრივი სტრუქტურა არეკეტებს ბიზნესს, რომელიც ძალადობს მოწმეებზე და ადამიანებზე, რომლებიც ფარავს და მალავს არასრულწლოვნის მკვლელობის საქმეს".

"რა თქმა უნდა, ამ ყველაფერს სჭირდება პასუხის გაცემა შს მინისტრისგან, მთავარი პროკურორისგან და ამ ყველაფერს სჭირდება პოლიტიკური პასუხის გაცემა არჩევნებზე",- განაცხადა დეპუტატმა.

გუშინ, 14 ოქტომბერს რუსთავი 2-ის მიერ გავრცელებულ აუდიოჩანაწერში, რომლის ავთენტურობა ჯერ არაა დადგენილი, სავარაუდოდ, ხორავას ქუჩის საქმეზე დანაშაულის შეუტყობინებლობისთვის დაკავებული მირზა სუბელიანის საუბარია ასახული. ჩანაწერის მიხედვით, ის ჰყვება, რომ ქართული ოცნების უკანონო საქმიანობის დამადასტურებელი უზარმაზარი რაოდენობის მტკიცებულებები აქვს დაარქივებული. კერძოდ, საუბარია ადამიანთა გატაცებასა და წამებაზე.

გაიგეთ მეტი: