რუსთავი 2-ის ჟურნალისტებისთვის პროფესიულ საქმიანობაში ხელის შეშლისა და ძალადობის ბრალდებით დაკავებულებს ხაშურის სასამართლომ აღკვეთის ღონისძიების სახით პატიმრობა შეუფარდა. მოსამართლემ გადაწყვეტილება დღეს, 13 ოქტომბერს მიიღო.

ბრალდებულები შსს-მ 2 დღის წინ, 11 ოქტომბერს დააკავა. უწყების ინფორმაციით, 10 ოქტომბერს მათ ტელეკომპანია რუსთავი-2-ის გადამღებ ჯგუფს, პროფესიული მოვალეობის შესრულების დროს, სიტყვიერი და ფიზიკური შეურაცხყოფა მიაყენეს და საქმიანობაში ხელი უკანონოდ შეუშალეს. მომხდარ ფაქტთან დაკავშირებით, სამართალდამცველებმა ჩინეთის რკინიგზის 23-ე ბიუროს სოფელ ქვიშხეთის ობიექტის უფროსის მოვალეობის შემსრულებელი და ამავე ორგანიზაციის თარჯიმანი დააკავეს.

გამოძიება ძალადობისა და ჟურნალისტის პროფესიულ საქმიანობაში უკანონოდ ხელის შეშლის ფაქტებზე, საქართველოს სსკ-ს 154-ე მუხლის მე-2 და 126-ე მუხლის პირველი ნაწილებით მიმდინარეობს.