რუსეთი ევროსაბჭოს გადაწყვეტილებით უკმაყოფილოა. ევროსაბჭომ მიიღო გადაწყვეტილება არ განეხილა რეზოლუცია რუსეთისთვის ხმის მიცემის უფლების დაბრუნების შესახებ. შესაძლოა, დოკუმენტი უახლოეს პლენარულ სხდომაზე, 2019 წლის იანვარში განიხილონ. ამ ეტაპზე კი რეზოლუცია კომიტეტებში დაბრუნდა.

რუსეთის დუმის ვიცე-სპიკერმა პიოტრ ტოლსტოიმ განაცხადა, რომ ევროსაბჭო კრიზისულ მდგომარეობაშია, რადგან ნაციონალური დელეგაციების დისკრიმინაცია ეწევა. ტოლსტოის განცხადებას რუსეთის სახელისუფლებო გამოცემა Ria ავრცელებს.

"მწუხარების გარდა სხვა არაფრის გამოწვევა ამას არ შეუძლია. რუსეთი არ მიიღებს მონაწილეობას ისეთ ორგანიზაციაში, რომელიც ეროვნული დელეგაციების დისკრიმინაციას ეწევა, ჩვენ საერთაშორისო ურთიერთობებში თანასწორობის მომხრეები ვართ.

რუსეთის დელეგაციას ევროსაბჭოში ხმის მიცემის უფლება 2014 წელს, ყირიმის ანექსიის შედეგად შეუჩერდა. ამის გამო რუსეთმა ევროსაბჭოს დაფინანსებასა და საპარლამენტო ასამბლეის მუშაობაში მონაწილეობაზე უარი თქვა.