ამერიკის შეერთებული შტატების პრეზიდენტმა, დონალდ ტრამპმა დასავლეთ ვირჯინიაში ამომრჩეველთან შეხვედრის დროს განაცხადა, რომ ჩრდილოეთ კორეის ლიდერმა კიმ ჩენ ინმა მას "შესანიშნავი" წერილები გაუგზავნა და "მათ ერთმანეთი შეუყვარდათ".

"მე მკაცრი ვიყავი ისევე, როგორც ის. ჩვენ უკან უნდა დავბრუნებულიყავით და თავიდან დაგვეწყო. შემდეგ ერთმანეთი შეგვიყვარდა, კარგია? არა, მართლა — მან მე მომწერა მშვენიერი წერილები და ეს წერილები ნამდვილად დიდებულია", — განაცხადა დონალდ ტრამპმა.

ტრამპის განცხადებას მხარდამჭერების სიცილი და ოვაციები მოჰყვა. ტრამპმა აღნიშნა, რომ კომენტატორები კიმ ჩემ ინის ასეთი სიტყვებით დახასიათებას "არაპრეზიდენტულად" მიიჩნევენ.

დონალდ ტრამპი და კიმ ჩენ ინი შეთანხმდნენ, რომ იმუშავებდნენ ნახევარკუნძულის დენუკლერიზაციის გეგმაზე. ეს გადაწყვეტილება ორი ქვეყნის ლიდერებმა სინგაპურის სამიტზე მიიღეს.

ტრამპის ადმინისტრაცია ემზადება კიმ ჩენ ინთან მეორე სამიტისთვის, რათა დენუკლერიზაციაზე ისაუბრონ. შეხვედრის დრო და ადგილი ამ დრომდე უცნობია. მიუხედავად ურთიერთობების თბილი ტონისა, ჩრდილოეთ კორეამ არ დააკმაყოფილა აშშ-ს მოთხოვნები, რათა დაასრულოს იარაღის სრული ინვენტარიზაცია და უარი თქვას მასზე.