12 ივნისს სინგაპურში ისტორიული სამიტი შედგა - აშშ-ის მოქმედი პრეზიდენტი და ჩრდილოეთ კორეის ლიდერი ერთმანეთს პირველად შეხვდნენ.

სამიტის ფარგლებში გაიმართა რამდენიმე შეხვედრა. მოლაპარაკებების შემდეგ დონალდ ტრამპმა და კიმ ჩენ ინმა ერთობლივ დოკუმენტს მოაწერეს ხელი.

დოკუმენტში ნათქვამია, რომ გაიმართა მრავალმხრივი და ყოვლისმომცველი სამიტი, რომელზეც აშშ-სა და ჩრდილოეთ კორეის ურთიერთობისა და კორეის ნახევრაკუნძულის უსაფრთხოების საკითხები განიხილეს.

პრეზიდენტმა, დონალდ ტრამპმა პირობა დადო, რომ ჩრდილოეთ კორეისთვის უსაფრთხოების გარანტიებს უზრუნველყოფდა. ჩრდილოეთ კორეის ლიდერმა, კიმ ჩენ ინმა დაადასტურა, რომ მოხდებოდა კორეის ნახევარკუნძულის ბირთვული განიარაღება.

დოკუმენტში გამოყოფილია ოთხი მნიშვნელოვანი პუნქტი:

  • აშშ და ჩრდილოეთ კორეა ვალდებულებას იღებენ, დაამყარონ ახალი ურთიერთობა, რაც მსოფლიოს მშვიდობისა და კეთილდღეობას უზრუნველყოფს;
  • აშშ და ჩრდილოეთ კორეა კორეის ნახევარკუნძულის მშვიდობიან და მტკიცე რეჟიმის დამყარებაში ჩაერთვებიან;
  • პანმუნჯომის 2018 წლის 27 აპრილის დეკლარაციის დადასტურებით, ჩრდილოეთ კორეა ვალდებულებას იღებს, რომ კორეის ნახევარკუნძულზე მოხდეს სრული ბირთვული განიარაღება;
  • მხარეები შეთანხმდნენ, რომ იდენტიფიცირდება და ამერიკაში დაბრუნდება ამერიკელი სამხედროების გვამები, რომლებიც კორეის ომის დროს ჩრდილოეთ კორეაში დაატყვევეს ან უგზო-უკვლოდ დაიკარგნენ.

დოკუმენტით, ასევე, განსაზღვრულია, რომ სამიტის შედეგების რეალიზებისათვის უმოკლეს ვადებში აშშ-ის სახელმწიფო მდივანს, მაიკ პომპეოსა და ჩრდილოეთ კორეის მაღალჩინოსანს შორის შეხვედრა შედგება.

ფოტო: Saul Loeb / AFP / Getty Images